ଶୀତ ପାଇଁ

କୁହୁଡ଼ି କୁହୁଡ଼ି ସକାଳ

ଦିଗ ହରା ଦିଗନ୍ତ

ଦୃଶ୍ୟ ଅଦୃଶ୍ୟ ଭିତରେ

ପଶ୍ଚିମ ଆକାଶ ।

ପାଦରେ ଶୀତଳ ଶୃଙ୍ଖଳ

ଗତିଶୀଳ ସମୟ ଦେହରେ

ଟ୍ରାଫିକର ନାଲିବତୀ

ଜଳେ ଅବିରତ ।

ରାସ୍ତାକଡ ବତୀଖୁଣ୍ଟ ପାଇଁ

ଶୀତ ଗୋଟେ କ'ଣ ।

ଆକାଶକୁ କମ୍ଵଳ

ମାଟିକୁ ଶେଯ କରି

ଦିନ କାଟୁଥିବା

ପାଗଳୀ ବୁଢ଼ୀଟା ପାଇଁ

ଶୀତ

ଦେହର ମଳି ଟିକେ

ଲାଗି ଥିଲେ ଲାଗିଥାଉ

ନାହିଁଟି ଭୃକ୍ଷେପ ।

ଶୀତ କେବେ

ଫ୍ରକ୍ ପିନ୍ଧା ଝିଅଟିଏ

ଡେଉଁ ଥିବ ଘର ସାରା

ତ ପୁଣି କେବେ

ମୁଣ୍ଡରେ ଓଢ଼ଣା ଦେଇ

ଅଗଣା ସାରା

ଝୋଟି ଚିତା ଆଙ୍କୁଥିବ ।

ଅଝଟ ପୁଅଟି ପରି ଶୀତ

ପାହାନ୍ତା ପ୍ରହରୁ

ରାହା ତୋଳି କାନ୍ଦୁଥିବ

ସବୁ ନିଅଣ୍ଟ

ତା' ଅଝଟ ପଣକୁ

ନିଅଣ୍ଟ

ଆକାଶ ଭର୍ତ୍ତି ତାରା

ରାତି ଭର୍ତ୍ତି ସ୍ଵପ୍ନ ।

ଅଳିଅଳ ରଜାଝିଅ ଶୀତ

ଟଙ୍କାଟିଏ ପାଇଁ

ପୋଷାକ ଝିଙ୍କି ଆକର୍ଷୁଥିବା

ବାରବୁଲା ଝିଅ ଶୀତ

ତୁମେ ତାକୁ କୋଳେଇ ପାର

ଦୟା ଦେଖେଇ ପାର ।।