ଶିବ ବିବାହ
ଶିବ ବିବାହ
ପତ୍ନୀଙ୍କ ଅନ୍ତେ ଭଗବାନ ହୋଇ ମଧ୍ୟ କଲେ ବିଳାପ
ସେ ଆଉ କେହି ନୁହେଁ ମୋ ପ୍ରିୟ ପ୍ରଭୁ ଭୋଳାନାଥ
ବର୍ଷ ବର୍ଷ ଧରି ଯେ ଅପେକ୍ଷାରେ ଥିଲେ ସତୀଙ୍କର
ସେ ଆଉ କେହି ନୁହେଁ ହୃଦୟନାଥ ମୋ ଆଶୁତୋଷ
ପତି ଭକ୍ତି ଯାର ସମୁଦ୍ର ଆକାଶକୁ କରି ଦିଏ ପାର
ତ୍ରିଲୋଚନ ସୁନ୍ଦରୀ ସେ ପ୍ରାଣ ପ୍ରିୟା ମହେଶଙ୍କର
ପତିବ୍ରତା ସତୀ ନାରୀର ଯିଏ ନିରୀହ ସ୍ୱରୂପ
ସେ ଆଉ କେହି ନୁହେଁ ମାତା ପାର୍ବତୀ ମୋର
ଆସିଛି ଆଜି ଶୁଭର ବେଳ
ହୋଇବ ପରା ଶିବ ବିବାହ
ଜ୍ୟେଷ୍ଠ ମାସର ଶୁକ୍ଳ ପଞ୍ଚମୀ ତିଥି
ବର ବେଶ ଧରି ଯିବେ ଭୋଳା ବାହାରି
ରାଣୀ ମୈନାଙ୍କ ଝିଅ ସେ ଅପୂର୍ବ ସୁନ୍ଦରୀ
ଶୀତଳ ଷଷ୍ଠୀରେ ସାଜିବେ ହରଙ୍କ ଗୌରୀ
ପ୍ରଜାପତି ବ୍ରହ୍ମା କରିବେ ବିବାହ ସମ୍ପନ୍ନ
କନ୍ୟାଦାନ ଦେବେ ପର୍ବତ ରାଜ ହିମାଳୟ
ନବ ବଧୁ ମାତା ବାପ ଘର ଛାଡ଼ି
ଶୁକ୍ଳ ଷଷ୍ଠୀରେ ନେବେ ବିଦାୟ
ନାଚିବେ ଗାଇବେ ଦେବ ଋଷି ସହ
ମାନବ ତଥା କେତେ ଭୂତପ୍ରେତ ଗଣ
ଉଠିବ ପଡ଼ିବ ଝୁମିବ କୈଳାସ
ପାଇ ଖୁସି ଆନନ୍ଦର ଆଗମନ
ଯାହାଙ୍କ ପ୍ରେମର ଉଦାହରଣ ଦିଏ ସାରା ସଂସାର
ତାଙ୍କ ବିବାହ ବନ୍ଧନରେ କି ସୁଖ ନଥିବ ଟିକେ କୁହ
ଯାହାଙ୍କୁ ସ୍ମରଣ କଲେ ହୃଦୟ ଚିତ୍ତ ହୁଏ ପ୍ରସନ୍ନ
ସଦାଶିବ ମଙ୍ଗଳମୟ ସେ କରୁଣାର ନାଥ
ଆଦି ପରାଶକ୍ତି ପ୍ରକୃତିଙ୍କ ସେ ହୃଦୟ ଚନ୍ଦନ
ଅନାଦି କାଳରୁ ହୋଇ ଆସୁଛି ତାଙ୍କ ପ୍ରେମର ଗାନ
ତାଙ୍କ ପ୍ରେମ କାହାଣୀ ସଂସାରରେ ଅଦ୍ଵିତୀୟ ଜାଣ
ଅମର ବର ପ୍ରଦାୟକ ଅକାଳ ମୃତ୍ୟୁ ନିବାରକ
ଶିବ ଶମ୍ଭୁ ସେ ସଦାଶିବ ଭୋଳା ମହେଶ୍ୱର
ଯାହାଙ୍କ ପାଇଁ ସାଜିଛନ୍ତି ଦେବୀ ଗୌରୀ
ଭବାନୀ ପାର୍ବତୀ କାଳୀ ମହାକାଳୀ
ନାହିଁ ତାଙ୍କ ଅସୀମ ପ୍ରେମର ଅନ୍ତ
ନେବାକୁ ପଡୁ ପଛେ ଶତ ଜନମ
ଯେଉଁ ଦେବ ଉପରେ ନପଡେ କାମର ପ୍ରଭାବ
ତାଙ୍କ ହୃଦୟରେ ବସି ପାରିଲେ ଦେବୀସତୀ ଏକ
ଜନ୍ମ ଜନ୍ମର ସେ ନିବିଡ଼ ସମ୍ପର୍କ
ଯେଉଁ ରୂପେ ଆସିଲେ ମଧ୍ୟ କେବଳ ସେ ଶିବଙ୍କର
ପତି ପତ୍ନୀ ହୋଇ ନ ପାରନ୍ତି ଭିନ୍ନ
ପ୍ରମାଣ ପାଇଁ କଲେ ମିଳିତ ରୂପ ଧାରଣ
ପତି ଅର୍ଦ୍ଧାଙ୍ଗ ହେଲେ ପତ୍ନୀ ହୁଏ ଅର୍ଦ୍ଧାଙ୍ଗିନୀ
ଶିବ ଶରୀର ହେଲେ ପାର୍ବତୀ ତାଙ୍କ ପ୍ରାଣ
ପରସ୍ପରକୁ ଶକ୍ତି ଯୋଗାଏ ତାଙ୍କ ଭକ୍ତି ପ୍ରେମ
ମାଆ ଆଦିଶକ୍ତିଙ୍କ ଅତୁଟ ଶ୍ରଦ୍ଧା ଶକ୍ତି ସାଜି
ଆଣି ପାରିଲା ନିରାକାରଙ୍କୁ ଦେଇ ଆକାର
ମାତୃ ଶକ୍ତିର ଆଧାର ସେ ଦେବୀ ମହାଗୌରୀ
ଶିବଙ୍କ ବଗିଚାରେ ଫୁଟାଇଛନ୍ତି କାର୍ତ୍ତିକେୟ ଗଣପତି
ଅପୂର୍ବ ପ୍ରେମ ଭକ୍ତିରେ ଭରା ତାଙ୍କ କାହାଣୀ
ଯେତେ ଶୁଣିଲେ ବି ପୁରେନା ମନ ନିଏ ହୃଦୟ ଜିଣି
ଶେଷରେ ତାଙ୍କ ନିକଟରେ କରିବି ଏତିକି ଗୁହାରି
ସଂସାରର ସବୁ ପତିପତ୍ନୀ ହୁଅନ୍ତୁ ତାଙ୍କ ପ୍ରତିଛବି ।