ଶୁଭ ପରିଣୟ
ଶୁଭ ପରିଣୟ
ବିବାହ ଅଟଇ ପବିତ୍ର ବନ୍ଧନ
ନୁହେଁ ପିଲା ଖେଳଘର
ସୁକୁମାରୀ କନ୍ୟା ସାଜେ ନବବଧୂ
ଯୁବକ ସୁବେଶ ବର ।
ପଟୁଆର ଧରି ଆସଇ ପୁରୁଷ
ବାଜଇ ଯୋଡ଼ି ମହୁରୀ
କନ୍ୟା ଗୃହେ ହୁଏ ବିବାହ ସମ୍ପନ୍ନ
ଶୁଭେ ଶଙ୍ଖ ହୁଳହୁଳି ।
ଶୁଭ ପରିଣୟ ପାଣିର ଗ୍ରହଣ
ସମ୍ପାଦିତ ହୁଏ ବିଧି
ଦଶ ଦିଗପାଳ ହୋମର ଅଗ୍ନିକୁ
ରଖାଯାଇଥାଏ ସାକ୍ଷୀ ।
ସାତଟି ବଚନ ଦିଅଇ ପୁରୁଷ
ଆକାଶ ସ୍ୱରୂପ ବର
କନ୍ୟା ରୂପୀ ଧରା କରଇ ଗ୍ରହଣ
ମନ୍ତ୍ର ହୁଏ ଉଚ୍ଚାରଣ ।
ପଡ଼େ ହସ୍ତଗଣ୍ଠି ହୁଏ ସପ୍ତଫେରା
ମାନସ ଶୁଭ ସଙ୍କଳ୍ପ
ଜୀବନ ସମ୍ପର୍କ ରଖିବେ ଅତୁଟ
ପାଳି ଉତ୍ତର ଦାୟିତ୍ଵ ।
ନିର୍ବାହ କରିବେ ସହଭାଗୀତାରେ
ସଂସାରେ ନିଜ କର୍ତ୍ତବ୍ୟ
ସହଚରୀ ପତ୍ନୀ ଅଟନ୍ତି ବାମାଙ୍ଗୀ
ସାହଚର୍ଯ୍ୟେ ଚଉବର୍ଗ ।
ବିତିଯାଏ ଯୁବା ପ୍ରୈ।ଢ ବୃଦ୍ଧାବସ୍ଥା
ଏକତ୍ର ସହାବସ୍ଥାନେ
ବୃଦ୍ଧ ପିତାମାତା ଶାଶୁ ଶଶୁରଙ୍କ
ସେବାଯତ୍ନ ଅନୁକ୍ଷଣେ ।
ଉତ୍ପନ୍ନ ହୁଅଇ ଯଶସ୍ଵୀ ସନ୍ତାନ
ଉଜ୍ଜ୍ବଳ ହୁଅଇ କୁଳ
ଜୀବନ ପ୍ରବାହ ହୁଅଇ ସ୍ୱଚ୍ଛନ୍ଦ
ବିବାହ ମୂଳ ସଂସ୍କାର ।
ନାରୀ ଗୀତ ଛନ୍ଦ ମଧୁର ସଙ୍ଗୀତ
ଉର୍ଜାସ୍ରୋତ ସୁପୁରୁଷ
ସମନ୍ୱୟେ ସୃଷ୍ଟି ସୃଜନ ପାଳନ
ଜୀବନ ହୁଏ ସାର୍ଥକ ।