Library
Profile
ଶେଷ ନିଷ୍ପତ୍ତି
ଶେଷ ନିଷ୍ପତ୍ତି
ବାର ବାର କିମ୍ପା ସୁନାର ହରିଣ
ମାୟାରେ ନେଉଛ ଡାକି
ମୋହର ଆବେଗେ ଧରିବାକୁ ଗଲେ
ଛୁପି ଯାଅ ତ୍ରାହି ଡାକି ? [୧]
ମଧୁର ପ୍ରେମର ଆଶ୍ୱାସନା ଦେଇ
ପ୍ରାଣରେ ପୁଲକ ଲେପି,
ପ୍ରତ୍ୟାଶାର ପ୍ରଲୋଭନେ ପଡିଗଲେ
ପ୍ରତ୍ୟାଖ୍ୟାନ ଦିଅ ଭେଟି? [୨]
ଇନ୍ଦ୍ରଧନୁ ଆଶା ମନରେ ଖେଳାଇ
ଜୀବନ ହସାଇ ଦିଅ ,
ଆର ଘଡି ପୁଣି ଅଦିନ ଝଡ଼ରେ
ସେ ହସ ଉଡେଇ ନିଅ ? [୩]
ମନୁଆ ପଣର ଉଠା ପକା ଢେଉ
ପାହାରେ ପାଉଛି ସଜା,
ଅନ୍ତର ନିଗିଡି ବୋହୁଛି ରୁଧିର
ବୁଝିକି ହୁଅ ଅବୁଝା ! [୪]
ଛଳନା ଜାଲରେ ମୋ ମନ ଚଢେଇ
ହୁଏ କେତେ ଛଟପଟ,
ସୁନ୍ଦର ନିରୀହ ପକ୍ଷୀ ଧରିବାଟା
ଶିକାରୀର ବେଉସାତ ! [୫]
ବହୁରୂପୀ ଯିଏ ସାଇତିଛି ତାର
ଦେହରେ ବହୁ ହୃଦୟ ,
ସିଏ କଣ କେବେ ବୁଝିବ ହୃଦୟ-
ବିନା ଦେହଟିର ଦାହ ? [୬]
ଜୀବନ ଦିଏ ଯେ ଖୁସିରେ ରଙ୍ଗେଇ
ସେଇ ପରା ସଚ୍ଚା ସଙ୍ଗୀ,
ଲୁହ ଦରିଆରେ ଭସେଇ ଦିଏ ଯେ
ସାଥି ନୁହେଁ ସତରଙ୍ଗୀ ! [୭]
ହେ ଜଗତ ପତି! ତୁମ ଦ୍ୱାହି ଦେଇ
ନେଉଛି ଶେଷ ନିଷ୍ପତ୍ତି ,
ଷଠ ମିତ ଠାରୁ ଦୂରେଇ ରହିବି
ଦିଅ ମତେ ସଦଗତି। [୮]
