Library
Profile
ଶେଷ ମଗୁଶିର ମାସ
ଶେଷ ମଗୁଶିର ମାସ
ଡାକିଲାଣି ଆସି ସକାଳୁ ସକାଳୁ
ଅଗଣାରେ ବସି କାଉ
ମଗୁଶିର ମାସ ଗୁରୁବାରଟାରେ
ଉଠି ପଡ଼ିଲାଣି ବୋଉ
ଆଣ ତାଟିଆଏ ଧରି,
ବୋଉ ଆଙ୍କୁଅଛି ଲକ୍ଷ୍ମୀ ପାଦ ଛବି
ଶୀତ ସକାଳରେ ଥରି ।
ବାପା ଆଣିଥିଲେ ବାଲିଯାତରାରୁ
ବୋଉ ପାଇଁ ଯେଉଁ ଶାଢ଼ୀ
ସେଇ ଶାଢ଼ୀ ବୋଉ ଗାଧେଇ ପିନ୍ଧିଛି
ପେଟରା ଭିତରୁ କାଢି
ଚିକି ଚିକି କରେ ଜରି,
ବୋଉ ମୋର ସତେ ଦିଶୁଚି ଯେମିତି
ଲକ୍ଷ୍ମୀ ପ୍ରତିମାଟେ ପରି ।
ଏସନ ବିଲରୁ ଜେଜେ ଆଣିଥିଲେ
ନୂଆ ଧାନ କେଣ୍ଡା ବେଣୀ
ସେଇ ଧାନକେଣ୍ଡା ସଜେଇଛି ବୋଉ
ମାଣ ଖଟୁଲିରେ ଆଣି
>କିସୁନ୍ଦର ଦିଶେ ଆହା,
ପଦୁଅଁ ଫୁଲରେ ମାଳ ସଜାଉଛି
ବିଜେ ହେବେ ଲକ୍ଷ୍ମୀ ମାଆ ।
ସାରା ରାଇଜ ମୁଁ ବୁଲି ଆସିଲିଣି
ଏମିତି ପରବ ନାହିଁ
ଯେଉଁ ପରବରେ ସାରା ପରିବାର
ଏକାଠି ଦେଖିନି କାହିଁ
ମିଳି ମିଶି ବାପା,ଭାଇ
ବୋଉ ପଢୁ ଥାଏ ଲକ୍ଷ୍ମୀ ପୁରାଣକୁ
ଶୁଣୁଥାନ୍ତି ଜେଜେ,ଆଈ ।
ଧୂପ,ଦୀପ,ଝୁଣା, ଚନ୍ଦନ ବାସରେ
ମହକି ଉଠୁଛି ଘର
ଚକୁଳି,କାକରା,ମଣ୍ଡାପିଠା ବୋଉ
ଗଢୁ ଅଛି ଦେଇ ପୁର
ଦେଖିବ କିଏସେ ଆସ,
ଫେରି ଯାଉଅଛି ଏଇ ଗୁରୁବାରେ
ଶେଷ ମଗୁଶିର ମାସ ।
