ଆମେ ସ୍ଵାଧୀନ

ଭାରତର ପ୍ରଥମ ସ୍ଵାଧୀନତା ସଂଗ୍ରାମ-1817 

ଖୋରଧା ମାଟିରେ ହାତଦେବ ଯିଏ ତା'ର ହାତ କାଟି ଝୁଲେଇବି,

ଲୁଣ୍ଠନକାରୀ ଫିରିଙ୍ଗି ଶାସନ ଭାରତ ମାଟିରୁ ହଟେଇବି ।

ଶପଥ କରିଲେ ମୁକୁନ୍ଦଦେବଙ୍କ କମାଣ୍ଡର ବକ୍ସି ଜଗବନ୍ଧୁ,

ରୋଢ଼ଙ୍ଗଗଡ଼ର ଜମିଦାର ପୁଣି ଥିଲେ ସାହସର ମହାସିନ୍ଧୁ ।

ଚକ୍ରାନ୍ତ କରିଲେ ଦାରୋଗା ଗୁମାସ୍ତା କିଛି ଦେଶଦ୍ରୋହୀ ଗଲେମିଶି, 

ଜମିଦାରୀ ତାଙ୍କ ଉଚ୍ଛେଦ ହୋଇଲା ନିଶ୍ୱ ହୋଇଗଲେ ବୀରବକ୍ସି ।

ସ୍ୱାଭିମାନୀ ବୀର ମାତୃଭୂମି ପାଇଁ ବିଦ୍ରୋହର ଅଗ୍ନି ଦେଲେଜାଳି,

ଏକଶହ ଆଠ ଗଡ଼ ଦଳେଇଙ୍କୁ ମିଶାଇ କରିଲେ ମହାମେଳି । 

କଣ୍ଟାକୁ କଣ୍ଟାରେ କଢ଼ାଯାଏ ଜାଣି ସଂଗ୍ରାମ କରିଲେ ମୁକ୍ତିପାଇଁ,

ବିପ୍ଲବର ସ୍ୱର ଝଙ୍କୃତ ହେଲା କମ୍ପିଲା ଖୋରଧା ଗଡ଼ଭୂଇଁ ।

ପାଇକ ବିଦ୍ରୋହ ଗଣ-ବିପ୍ଳବରେ ଧୀରେ ଧୀରେ ପରିଣତ ହେଲା,

ଫାର୍ସା ଚୋଟରେ ବିଶ୍ୱାସଘାତକ ଚରଣର ପ୍ରାଣ ଛାଡ଼ିଗଲା ।

ମାଟିଲେ ବିପ୍ଲବୀ ଗଲେ ଶ୍ରୀକ୍ଷେତ୍ରକୁ ଇଂରେଜ ଅଫିସ କଲେ ଧ୍ୱଂସ,

ସ୍ୱାଧୀନ ହୋଇଲା ଶଙ୍ଖକ୍ଷେତ୍ର ପୁରୀ ପରାଧୀନ ଥିଲା ସାରାଦେଶ ।

ଆଠବର୍ଷ କାଳ ଚାଲିଲା ଦମନ ବନ୍ଧୁକ ଗୁଳିରେ ମଲେ କେତେ,

ଫାଶୀରେ ଝୁଲିଲେ ବଣରେ ଲୁଚିଲେ ନିର୍ଭିକ ବୀର ଥିଲେଯେତେ ।

ସତର ମସିହା ବିପ୍ଳବ ଦମନ ହୋଇଗଲା ପୁଣି ପଚିଶରେ,

ଅସହାୟ ସିଂହ ଯନ୍ତାରେ ପଡ଼ି ପ୍ରାଣଦେଲେ ଚାରିବର୍ଷ ପରେ ।