ଦେଶ ବନ୍ଦନା -ଡକ୍ଟର କୃତ୍ତିବାସ ନାୟକ

ଯେତେ ଗାଇଲେ ବି ମୋ ଜନନୀ ଗାଥା-

ତା' ଗୁଣ ସରିବ ନାହିଁ,

ମାଆ ସିନା ମୋତେ ଜନମ ଦେଇଛି-

ପାଳୁଛି ଜନମ ଭୂଇଁ |(ଘୋଷା )

ମୋ ମାଟି ମାଆର ପାଣି-ପବନରେ-

ଗଢା ଏ ଶରୀର ମୋର,

ତା'ର ଦାଣ୍ଡଧୂଳି ବୋଳି ହୋଇଗଲେ-

ଦୁଃଖ ହୋଇଯାଏ ଦୂର |

ହିମାଳୟଠାରୁ କୁମାରୀକା ଯାଏ-

ମନ ମୋର ଯାଏ ଧାଇଁ |

ଯେତେ ଗାଇଲେ ବି ମୋ ଜନନୀ ଗାଥା-

ତା' ଗୁଣ ସରିବ ନାହିଁ |(1)

ନଦୀ ଝରଣାର କୁଳୁକୁଳୁ ନାଦ-

କୋଇଲିର କୁହୁତାନ,

ସୁନାର ଫସଲ ନାନାଜାତି ଫୁଲ-

କିଣିନିଏ କୋଟିମନ |

ଯାହାପାଇଁ ଯାହା ଲୋଡ଼ା ମାତୃଭୂମି-

ଦେଉଛି ମନକୁ ଚାହିଁ |

ଯେତେ ଗାଇଲେ ବି ମୋ ଜନନୀ ଗାଥା-

ତା' ଗୁଣ ସରିବ ନାହିଁ |(2)