ଶାଶ୍ୱତ ପ୍ରେମ

ଶାଶ୍ୱତ ପ୍ରେମର ଅନ୍ତ ନାହିଁ କେବେ ସମୟ ନଈର ଧାରେ

ଜୀବନ୍ତ ସର୍ବଦା ରହିଥିବ ସିଏ ଏହି ବିଶ୍ୱ ବ୍ରହ୍ମାଣ୍ଡରେ

ସବୁକିଛି ଏଠି ବଦଳିଯାଉଛି ପ୍ରକୃତି ରାଣୀର କୋଳେ

ଶାଶ୍ୱତ ପ୍ରେମ ଯେ ଚିର ସବୁଜିମା ଅଶାଶ୍ୱତ ରାଇଜରେ

ତପନର ପ୍ରେମ ନଳିନୀ ନିମନ୍ତେ କି ସୁନ୍ଦର ମନୋହର

ଅଂଶୁମାଳୀ ମୁଖ ଦର୍ଶନ ପାଇଁକି ସଦା ପଦ୍ମ ତତପର

ଶଶୀ ନୀଳ ଗଗନରୁ ଦେଖୁଥାଏ କୁମୁଦର ସୌନ୍ଦର୍ଯ୍ୟତା

ପ୍ରକୃତି କୋଳରେ ସରସୀ ତଟର ପ୍ରାକୃତିକ ବିଚିତ୍ରତା

ଶାଶ୍ୱତ ପ୍ରେମରେ ନଥାଏ କାଳୀମା ନଥାଏ କାମନା ଲୋଭ

ଭଲ ପାଇବାରେ ହୁଏଯାହା ଲାଭ ହିଂସା,କ୍ରୋଧେ କି ସମ୍ଭବ

ଭକ୍ତ ଭଗବାନ ଶାଶ୍ୱତ ପ୍ରେମରେ ବନ୍ଧା ନିତ୍ୟ ନିରନ୍ତର

ପିତାମାତା ସ୍ନେହ ସନ୍ତାନ ନିମନ୍ତେ ଅମୂଲ୍ୟ ରତ୍ନ ଭଣ୍ଡାର

କର ସର୍ବେ ପ୍ରେମ ନିଜର ଦେଶକୁ ସର୍ବଶ୍ରେଷ୍ଠ ପ୍ରେମ ଏହି

ଯେଉଁ ପ୍ରେମ ବଳେ ସରବେ ନିଜର ଶାଶ୍ୱତ ପ୍ରେମଟି ସେହି