ସେତୁବନ୍ଧ

ମଧୁମୟ ସୃଷ୍ଟି ବିରାଟ ବିଶ୍ୱରେ

ସୁସାହିତ୍ୟ ସେତୁବନ୍ଧ

ଗୁଣ୍ଡୁଚି ପ୍ରାୟେକ ସାହିତ୍ୟିକ ମାତ୍ର

ପାଳେ ସୃଷ୍ଟି ଅନୁବନ୍ଧ ।

ସୃଜନ କର୍ମରେ ଉତ୍ସର୍ଗେ ଜୀବନ

ଢାଳି ଦିଏ ମନପ୍ରାଣ

ସୁମଧୁର କାବ୍ୟ କବିତା ପ୍ରବନ୍ଧେ

ବିତରେ ଅମୃତ କଣ ।

ସାର୍ଥକ ସୁନ୍ଦର କୃତି ଅନୁପମ

ସାରସ୍ୱତ ମୂଳ ଭିତ୍ତି

ସୁଦୃଢ଼ କରଇ ବନ୍ଧୁତ୍ୱ ଭାବନା

ବିଶ୍ଵ ଶାନ୍ତି ମୈତ୍ରୀ ପ୍ରୀତି ।

ପ୍ରତିଷ୍ଠା ଉତ୍ତମ ସୁସାହିତ୍ୟ ମଞ୍ଚ

ଆବାହନ ପ୍ରକାଶନ

ବଢାଉ ବରଦ ଶ୍ରୀହସ୍ତ ଅଦୃଶ୍ୟେ

ଉନ୍ମେଷୁ ମହତ କର୍ମ ।

ଗୁଣ୍ଡୁଚିର ଦେହେ ସୁଶୋଭୁ ସର୍ବଦା

ହସ୍ତରେଖା ଶୁଭାଶିଷ

ସତ୍ୟ ତ୍ୟାଗ ନିଷ୍ଠା ସୁମତି ସୁଗତି

ଜୀବନ ଲଭୁ ଆଦର୍ଶ ।

ଅସତ୍ୟ ଅନ୍ୟାୟ ପାପ କଳ୍ମଷର

ହେଉ ବିନାଶ ବିଲୟ

ଶ୍ରୀ ରାମ ଶ୍ରୀ କୃଷ୍ଣ ଅବତର ପ୍ରଭୁ

ଧରମର ହେଉ ଜୟ ।