ଲାଇବ୍ରେରୀ
ପ୍ରୋଫାଇଲ୍
ସେ କେମିତି ଜାଣିବ
ସେ କେମିତି ଜାଣିବ
ସେ କେମିତି ଜାଣିବ
ସେ କେମିତି ଜାଣିବ,
ମୋର ପ୍ରତି ପ୍ରାର୍ଥନାରେ ସେ ହିଁ ଥାଏ।
ଅଧର ନୀରବ ରହିଲେ ବି,
ହୃଦୟ ତା' ନାମ ନିରବରେ ଗାଏ।।
ସେ କେମିତି ଜାଣିବ,
ରାତିର ନିର୍ଜନତା ମୋତେ
ଯେତେବେଳେ ଘେରିଯାଏ।
ଅନ୍ଧାର ଭିତରେ ତା' ସ୍ମୃତିଟି,
ଏକ ଦୀପ ପରି ମନରେ ଜଳିଯାଏ।।
ସେ କେମିତି ଜାଣିବ,
ତା'ର ଏକ ହସ ପାଇଁ କେତେ ଅପେକ୍ଷା
ଏକ ମୁହୂର୍ତ୍ତର ଦେଖା ପାଇଁ,
କେତେ ଦୀର୍ଘ ଲାଗେ ଏଇ ବିରହର ରାତିଟି।।
ସେ କେମିତି ଜାଣିବ,
ଦୂରତା କେବଳ ପଥକୁ ଅଲଗା କରିଛି।
ମୋ ମନର ଗଳିରେ ତ ଆଜିବି,
ତା' ପାଦଚିହ୍ନ ଅଲିଭା ହୋଇ ରହିଛି।।
ସେ କେମିତି ଜାଣିବ,
ପବନ ଯେବେ ତା' ଖବର ଆଣେ।
ମୋ ମନର ଶୁଖିଲା ଋତୁରେ,
ହଠାତ୍ ଅଜଣା ବସନ୍ତ ଫୁଟିଯାଏ।।
ସେ କେମିତି ଜାଣିବ,
ତା'କୁ ପାଇବାର ଇଚ୍ଛାଠାରୁ ବେଶି।
ତା'ର ଜୀବନ ଖୁସି ହେଉ ବୋଲି,
ମୁଁ ଭଗବାନଙ୍କ ପାଖେ ମାଗିଛି।।
ସେ କେମିତି ଜାଣିବ,
କିଛି ସମ୍ପର୍କ ନାମ ଖୋଜେ ନାହିଁ।
କିଛି ଭଲପାଇବା ଅଧିକାର ମାଗେ ନାହିଁ,
କେବଳ ଦୂରରୁ ମଧ୍ୟ ମନକୁ ଛୁଇଁଯାଏ।।
ହୁଏତ ସେ କେବେ ଜାଣିବନି,
ମୋ ନୀରବତାର ଅର୍ଥ କ'ଣ।
ତଥାପି ତା' ପାଇଁ ମୋ ପ୍ରାର୍ଥନା,
ସମୟଠାରୁ ମଧ୍ୟ ଅଧିକ ଦୀର୍ଘ ହେବ।।
କେବେ ଯଦି ପଚାରେ ସେ
“ମୋ ପାଇଁ କ'ଣ ଥିଲା ତୁମ ମନରେ?”
ତେବେ ହୁଏତ ହସି କହିବି
“ତୁମେ ଥିଲ, ଅଛ ଏବଂ ରହିବ,
ମୋର ପ୍ରତି ନୀରବ ପ୍ରାର୍ଥନାରେ…”।।
Priyanka Panda
