ଦଶହରା

‎ମର୍ଯ୍ୟାଦା ପୁରୁଷୋତ୍ତମ ରାମ, 
‎ଧର୍ମର ଦିବ୍ୟ ଜ୍ୟୋତି,
‎ରାବଣର ଦର୍ପ ଦଳନ କରି 
‎ରଚିଲେ ବିଜୟ କୀର୍ତ୍ତି।
‎ଦଶମୁଖୀ ଦର୍ପର ଦୁର୍ଗ 
‎ଭାଙ୍ଗି ଶର କଲା ସଂହାର,
‎ଅଧର୍ମର ଲଙ୍କା ଭସ୍ମୀଭୂତ, 
‎ଧର୍ମ ହେଲା ଜୟକାର।।
‎
‎ସୁବର୍ଣ୍ଣ ଲଙ୍କାର ସମୃଦ୍ଧି ହେଲା 
‎ଅହଙ୍କାରର ଦାସୀ,
‎ବିବେକହୀନ ବୈଭବ ଶେଷେ 
‎ମୃତ୍ୟୁର ଲେଖିଲା ରାଶି।
‎ଶକ୍ତି, ଶୌର୍ଯ୍ୟ, 
‎ପାଣ୍ଡିତ୍ୟ ସବୁ ହେଲା ନିଷ୍ଫଳ,
‎ଅଧର୍ମ ପଥର ଅନ୍ତିମ ପରିଣତି
‎ପତନ ଅନିବାର୍ଯ୍ୟ ଫଳ।।
‎
‎ଧନୁର୍ଧର ରାମଙ୍କ ଶରାଘାତେ 
‎ଦର୍ପର ହେଲା ଅବସାନ,
‎ସତ୍ୟର ଶଙ୍ଖନାଦେ ମୁଖରିତ ହେଲା 
‎ତ୍ରିଭୁବନ, ଦିଗନ୍ତ, ଗଗନ।
‎ବିଜୟା ଦଶମୀ ଆଣେ 
‎ଧର୍ମର ଶାଶ୍ୱତ ସନ୍ଦେଶ,
‎ସତ୍ୟ ସମ୍ମୁଖରେ ଅସତ୍ୟର ହୁଏ 
‎ଅବଶ୍ୟ ପରାଭବ ଶେଷ।।
‎
‎ଦଶହରା ନୁହେଁ କେବଳ ଉତ୍ସବ, 
‎ନୁହେଁ ଆଡ଼ମ୍ବର ମେଳା,
‎ଅନ୍ତରର ଅହଂକାର ଦହନେ 
‎ସାର୍ଥକ ହେଉ ଏ ବେଳା।
‎କାମ, କ୍ରୋଧ, ଲୋଭ, ମୋହ 
‎ଦହି ଜାଗୁ ବିବେକର ଆଲୋକ,
‎ମାନବତାର ମହାମନ୍ତ୍ରେ 
‎ଉଦ୍ଭାସିତ ହେଉ ଧରାଲୋକ।।
‎
‎ରାବଣ ଦହନେ ଦହୁ ଅହଂକାର, 
‎ଜାଗୁ ସତ୍ୟର ଜ୍ୟୋତି,
‎ରାମଙ୍କ ଆଦର୍ଶେ ପବିତ୍ର 
‎ହେଉ ମାନବତାର ମତି।
‎ଧର୍ମର ଧ୍ୱଜା ଉଡ଼ୁ ଗଗନେ, 
‎ଅଧର୍ମର ହେଉ କ୍ଷୟ,
‎ଯୁଗେ ଯୁଗେ ଗୁଞ୍ଜୁ ଏକ ବାଣୀ
‎ସତ୍ୟର ହିଁ ଜୟ!
‎
‎Priyanka Panda 
‎
‎କେବେ ତୋ ନୟନେ ପ୍ରଳୟର ଜ୍ୱାଳା, 
‎ଦୁଷ୍ଟଦଳନର ହୁଙ୍କାର,
‎କେବେ ସେ ନୟନେ କରୁଣାର ଧାରା, 
‎ମମତାର ମଧୁଝର।
‎ତୋ ଦୃଷ୍ଟିପାତେ ଦୁଃଖର 
‎ତିମିର ହୁଏ ମାଆ ଦୂର,
‎ତୋ ନୟନଯୁଗଳେ ଝଲସେ 
‎ମୋହର ବୈକୁଣ୍ଠ ସୁନ୍ଦର।।

Priyanka Panda 
‎