ସବୁ ବାହାସ୍ଫୋଟ

କବିତା - ସବୁ ବାହାସ୍ଫୋଟ
 ରଚନା - ପଞ୍ଚାନନ ଜେନା
ତାରିଖ -୨୩-୦୬-୨୦୨୬
+++++++++++++++
 ଯନ୍ତ୍ରଣାର ଛାଟ ଆଉ ଜଞ୍ଜାଳର ଚୋଟ
 ହାତ ମିଶେଇ ଦେଲେ
ଭୋକର କୁହାଟ ଟା ହୁଏ ଭାରି ଉଚ୍ଚାଟ

 ଅମା ଅନ୍ଧାରୀ ବାଟ ଅଜଣା ଅଶୁଣା ହାଟ
ହାତ-ପାଦ ମିଶେଇ ଦେଲେ
ବିପଦ ସଂକେତ ଟା ହୁଏ ଭାରି ଉଦ୍ଭଟ

 ସମସ୍ୟାର ନାଟ ଆଉ ସନ୍ତାପର ତୁଠ
ହାତ- ପାଦ- ତୁଣ୍ଡ ମିଶେଇ ଦେଲେ
ହା ହୁତାଶନ ଛୁଟେ ଯେସନ ବିକଟାଳ ଶକଟ

 କପଟ ମଲାଟ ଆଉ କୌଶଳ ବିରାଟ
 ହାତ-ପାଦ- ତୁଣ୍ଡ-ମୁଣ୍ଡ ମିଶେଇ ଦେଲେ
 ସମସ୍ୟାଟା ଅନ୍ତହୀନ ଦିଗେ ଲମ୍ବେ ଫଟାଫଟ

 ପ୍ରପଞ୍ଚର ଥାଟ ଆଉ ବାହାଦୁରିଆ ଆଲଟ
 ହାତ-ପାଦ- ତୁଣ୍ଡ-ମୁଣ୍ଡ-ସୁଣ୍ଡ ମିଶେଇ ଦେଲେ
 ସମାଧାନର କ୍ଷୀଣ ଆଶା ବି ମାରେ ଚମ୍ପଟ

 ସମସ୍ୟାର ଅଝଟ ଆଉ କଳ୍ପନାର କଳ୍ପବଟ
 ଟଣା ଓଟରା ଲାଗନ୍ତି ଯେସନ ଯୁଦ୍ଧ
ବିବେକର କାଛି ହୁଗୁଳା କରିଲେ ସବୁ ବାହାସ୍ଫୁଟ