Library
ସ୍ବର୍ଣ୍ଣ ଲଙ୍କା
ସ୍ବର୍ଣ୍ଣ ଲଙ୍କା
ବିଶ୍ରବା ନନ୍ଦନ ଅଟଇ ରାବଣ
ଲଙ୍କାପୁର ଅଧୀଶ୍ଵର
ମୟ ଦାନବର ନିର୍ମିତ ନଗରୀ
ଦିଶେ କେଡେ ମନୋହର ।
ସୁବର୍ଣ୍ଣେ ନିର୍ମିତ ଅଟେ ଏହି ଲଙ୍କା
ରକ୍ଷାସଙ୍କ ବାସସ୍ଥାନ
ତ୍ରିପୁର ବିଜୟୀ ଅଟେ ଦଶାନନ
ପ୍ରଜାଙ୍କୁ କରେ ଶାସନ ।
ଦେବତାମାନଙ୍କୁ ପାଦରେ ଖଟାଏ
ସ୍ବର୍ଣ୍ଣ ଲଙ୍କାପୁରେ ସିଏ
ବରୁଣ ଦେବତା ଜଳ ଭାର ନିତି
ଲଙ୍କାରେ ଯୋଗାଇ ଥାଏ ।
ପବନ ଦେବତା ଓଳାନ୍ତି ନଗର
ଇନ୍ଦ୍ର ଦ୍ୱାରପାଳ ଥାନ୍ତି
ପିତାମହ ବ୍ରହ୍ମା ସ୍ବର୍ଣ୍ଣ ଲଙ୍କା ପୁରେ
ବେଦ ମୁଖେ ଉଚାରନ୍ତି ।
ମୃତ୍ୟୁର ଦେବତା ଜନ୍ତୁପତି ଯମ
ନିଦ୍ରାରୁ ଥାନ୍ତି ଉଠେଇ
ଦେବତାମାନଙ୍କ ଅପକର୍ମ ଦେଖି
ଦଣ୍ଡ ଦିଏ ଲଙ୍କ ସାଇଁ ।
ସବୁବେଳେ ପୂଜା ପାଠ ମନ୍ତ୍ର କରେ
ବିଶୁଦ୍ଧ ବ୍ରାହ୍ମଣ ସିଏ
ମୁଖେ ସଦା ଚାରି ବେଦ ରହି ଥାଏ
ଧାର୍ମିକ ସେ ଲଙ୍କ ରାଏ ।
ସ୍ବର୍ଣ୍ଣ ଲଙ୍କାପୁରେ ସବୁ ତାର ଥିଲା
ନ ଥିଲେ ଲକ୍ଷ୍ମୀ ନାରାୟଣ
ଲକ୍ଷ୍ମୀଙ୍କୁ ଆଣିଲେ ଆସି ଯିବେ ପ୍ରଭୁ
ଭାବିଲା ଜ୍ଞାନୀ ରାବଣ ।
ମନେ ଖୋଜୁଥିଲା କେମିତି ଆଣିବ
କରୁଥିଲା ମନେ ଚିନ୍ତା
ସୂର୍ପଣଖା ଯେବେ ବାରତାଟି ଦେଲେ
ହରଣ କରିଲେ ସୀତା ।
ସ୍ବର୍ଣ୍ଣ ଲଙ୍କାପୁରେ ଲଙ୍କେଶ୍ୱରୀ ଦେବୀ
ଲଙ୍କା ସୁରକ୍ଷା କରନ୍ତି
ବୀର ହନମାନ ଜାବୁଡା ମାଡରେ
ଲଙ୍କା ଛାଡି ଚାଲି ଯାନ୍ତି ।
ସ୍ବର୍ଣ୍ଣ ପୁର ଲଙ୍କେ ଅଶୋକ ବନରେ
ସୀତାଙ୍କୁ ନେଇ ରଖିଲେ
ସୀତା ଠାବ କରି ବୀର ହନୁମାନ
ସ୍ବର୍ଣ୍ଣ ଲଙ୍କା ଜାଳି ଦେଲେ ।
ଇନ୍ଦ୍ରଙ୍କ ଆଦେଶେ ଦେବ ଶିଳ୍ପୀ ଆସି
ବିଶ୍ବକର୍ମା ପହଞ୍ଚିଲେ
ଶତ ଗୁଣେ ସ୍ବର୍ଣ୍ଣପୁର ଲଙ୍କାକୁ ସେ
ସ୍ବହସ୍ତେ ନିର୍ମାଣ କଲେ ।
ରାମ ରାବଣର ଚାଲିଲା ସମର
ତ୍ରିଭୁବନ କମ୍ପିଗଲା
ରାମଙ୍କ ହସ୍ତରେ ସେ ବ୍ରହ୍ମଶରରେ
ରାବଣ ବିନାଶ ହେଲା ।
ସ୍ବର୍ଣ୍ଣ ଲଙ୍କା ପୁର ରାଣୀ ମନ୍ଦୋଦରୀ
ବିକଳେ କ୍ରନ୍ଦନ କଲେ
ବିଭୀଷଣ ସାଥେ ମନ୍ଦୋଦରୀଙ୍କୁ
ବିବାହ କରାଇ ଦେଲେ ।
ସ୍ବର୍ଣ୍ଣ ଲଙ୍କା ପୁର ରାଜା ବିଭୀଷଣ
ରାଣୀ ହେଲେ ମନ୍ଦୋଦରୀ
ଶୁଭ ଆଶୀର୍ବାଦ ହସ୍ତ ମାଥେ ଦେଲେ
ଜାନକୀ କୋଦଣ୍ଡଧାରୀ ।
ରାମଙ୍କ ହସ୍ତରେ ରାବଣ ମରିଣ
ହୋଇଲା ବୈକୁଣ୍ଠ ପ୍ରାପ୍ତ
ଲକ୍ଷ୍ମୀ ନାରାୟଣ ମର୍ତ୍ତ୍ୟେ ଅବତରୀ
ଶାପୁ କରିଥିଲେ ମୁକ୍ତ ।
