ସ୍ବପ୍ନ
ସ୍ବପ୍ନ
ବିଜନ ବେଳାଭୂଇଁରୁ
ଶାମୁକା ପେଟରେ ମୁକ୍ତାର ସନ୍ଧାନରେ
ହାତ ବଢା଼ଉଥିବା କବି
କେମିତି ମୂକ ପାଲଟିଯାଉଛି
ସାଗରର ଲହଡି ଗଣି ଗଣି
ସ୍ବପ୍ନ ପାଲଟି ଯାଉଛି
ସବୁ ଆଶା ଆକାଂକ୍ଷା
କିନ୍ତୁ ଆତ୍ମଗ୍ଲାନିର ଶୂନ୍ୟପଣରେ
ଜରାଜୀର୍ଣ୍ଣ ଅଭ୍ୟାସମାନେ
ଅହରହ ଖୋଜିବୁଲନ୍ତି ଶାମୁକାର ସତ୍ତା
ସାଗରର ବାଲୁକା ଶଯ୍ୟାରେ !!
ଆକାଶ ଛାତିରେ ଚୂନା ଚୂନା
ଅସୁମାରି ଚିକମିକ ତାରାଫୁଲର
ଫିକ ଫିକ ହସରେ
ସଞ୍ଚରି ଯାଉଛି କବି
ସତେ ତୋଳି ଆଣିବ ସବୁତକ
ହସକୁରି ତାରାଫୁଲମାନଙ୍କୁ
ତା ଦୁଃଖରେ ସମଭାଗୀ ହେବେ
ସୁଖର ହାଟ ବସେଇବେ
ଲଟେଇକରି ତା ନିଃଶ୍ଚୁପ ଓଠଧାରରେ
କିନ୍ତୁ ହଜିଗଲେ
ପାହାନ୍ତି ବାର୍ତ୍ତାରେ !!
ଏମିତି ମେଞ୍ଚାଏ କୁହୁଡି ଭିତରେ
ପହଁରି ପହଁରି ଅପହଂଚରେ
ବାଟବଣା ହୁଏ କବି
ବତୁରିଯାଏ ଶୁଖିଲା ଦୀର୍ଘଶ୍ୱାସରେ
ଖୋଜିବୁଲେ ସ୍ମୃତିର ପାଦଚିହ୍ନ
ପୁଞ୍ଜିଭୂତ ଆବେଗରେ
ଏକଲାପଣରେ ଆପଣେଇନିଏ
ଦୂର ଦିଗବଳୟତଳର ପ୍ରେମ
ବିଶ୍ୱାସର ବାଲୁକାବନ୍ତରେ
ଆନମନା ହୁଏ କବି
ସ୍ତୁପୀକୃତ ଯନ୍ତ୍ରଣାରେ !!