ସ୍ବୀକାରୋକ୍ତି
ସ୍ବୀକାରୋକ୍ତି
ମୁଁ ଯେବେ ହେବି ମୁଠାଏ ସପନ
ତୁମେ ହେବ ମୋର ଆଖି
ମୋର ସପନକୁ ସଜାଇବା ଲାଗି
ତୁମେ ହେବ ଅନୁରାଗୀ ।
ମୁଁ ଯଦି ହେବି ମଧୁର ଝରଣା
ତୁମେ ହେବ ତା ମୂର୍ଚ୍ଛନା
ସାତସୁରେ ପ୍ରେମ ଗୀତର ଝଙ୍କାରେ
ବିତରିବା ସୁଖ ବାସ୍ନା ।
ମୁଁ ଯଦି ହେବି ଶୀତଳ ସମୀର
ତୁମେ ହେବ ତାର ଗନ୍ଧ
ତନୁମନେ କେତେ ବେପଥୁ ଜଗାଇ
ବୋହୁଥିବ ମନ୍ଦମନ୍ଦ ।
ମୁଁ ଯଦି ହେବି ଅସୀମ ଆକାଶ
ତୁମେ ହେବ ତାର ଜ୍ୟୋତି
ବସି ଦେଖୁଥିବି ଦିବାନିଶି ଏକା
ସୁରମ୍ୟ ହୃଦୟ ଯୋଖି ।
ମୁଁ ଯଦି ହେବି ଚଞ୍ଚଳା ତଟିନୀ
ତୁମେ ହେବ ଶୀତଳତା
ପ୍ରେମ ପ୍ରବାହର ଜ୍ବଳନ ପ୍ରାଣରେ
ଢାଳିଦେବା ପ୍ରେମ ଛିଟା ।
ମୁଁ ଯଦି ହେବି ସୀମାହୀନ ସିନ୍ଧୁ
ତୁମେ ହେବ ତା ତରଙ୍ଗ
ବେଦନା ବିଧୂର ପରାଣେ ପ୍ରୀତିର
ସଜାଇବା ନୂଆ ରଙ୍ଗ ।