ଗୀତପଦେ ଗାଇବା ଆସ
ଗୀତପଦେ ଗାଇବା ଆସ
ବହି ଆସୁଥିଲା ଚୋରା ଚଇତାଳି
ଦେହ ଯାଉଥିଲା ଛୁଇଁ
ରଇଜଳା ଖରା ଜାଳି ଦେଉଥିଲା
ଶୁଖି ଯାଉଥିଲା ଭୂଇଁ I
କାହିଁ କେତେଦୂରୁ କୋଇଲିର ସ୍ୱର
ଶୁଭୁଥିଲା ରହି ରହି
ମା ମଙ୍ଗଳାଙ୍କୁ ପ୍ରଣମିବା ଆସ
ଦୀପଟିଏ ଜାଳିଦେଇ I
ସଞ୍ଜ ନଇଁଗଲା ସୂରୁଜ ଦେବତା
ବାହୁଡିଲେ ନିଜଘରେ
ନୀଳ ଆକାଶରୁ ଶୀତଳ ଜୋଛନା
ଝର ଝର ହୋଇ ଝରେ I
ଆସ ଆସ ସଖୀ ହାତେ ହାତରଖି
ଚାନ୍ଦ ସହ କଥା ହେବା
ଚାନ୍ଦିନୀ ରାତିର ଶୁଭ୍ର ପଣତରେ
ମଥାକୁ ଘୋଡାଇ ଦେବା I
ତୋଳି ଆଣିବି ମୁଁ ତାରାଫୁଲ ସବୁ
ମାଳାଟିଏ ଗୁନ୍ଥି ଦେବି
ତୁମରି ଗଭାକୁ ଅତି ଆଦରରେ
ନିଜହାତେ ସଜାଇବି I
ସ୍ୱରଦେଇ ତୁମେ ଗୀତଟେ ଗାଇବ
ରଙ୍ଗ ବୋଳୁଥିବ ରାତି
ପ୍ରେମର ତରଙ୍ଗ କୂଳ ଲଙ୍ଘୁଥିବ
ଉଲ୍ଲସୁ ଥିବ ମୋ ଛାତି I