ସାପୁଆ କେଳା

ଡମ ଡମ ଡମ ଡମ ଡମ୍ବରୁ ବାଜିଲା l

ସାପୁଆକେଳା ବୋଲୁଛି ଦାଣ୍ଡେ ପଦ୍ମତୋଳା ll

କଂସର ଘରଣୀ କଲା ଓଷା ଧନେନ୍ତରୀ l

କହ୍ନାଇ ଦେବୁରେ ପଦ୍ମ ଲକ୍ଷେ ଭାର ଭରି ll

ଶ୍ୱେତ ପଦ୍ମ ରକ୍ତ ପଦ୍ମ ଦେବୁ ନନ୍ଦ ସୂତ l

ପାଖୁଡା ତହିଁରେ ମିଶି ନଥିବ କିଞ୍ଚିତ ll

ଆରଡ଼ିରୁ ଆସିଛି ମୋ ନାମ ଆଖଣ୍ଡଳ l

କରିବି ମୁଁ ଜାତି ଜାତି ସର୍ପଙ୍କର ଖେଳ ll

ବସନ ମୁଁ ପିନ୍ଧେ ନାହଁ ଯେଣୁ ଦିଗମ୍ବର l

ଭସ୍ମ ମୋହର ଭୂଷଣ ଶ୍ମଶାନରେ ଘର ll

ବେକରେ ଲମ୍ବଇ ମୋର ସର୍ପ ମାଳମାଳ l

ଆୟୁଧ ମୋ ଦେଖ ଏହି ସୁତୀକ୍ଷ୍ଣ ତ୍ରିଶୂଳ ll

ନାଗ ଯେ ଗୋଖର ପୁଣି ସର୍ପରାଜ ଅହି l

Advertisement

ପେଡ଼ିରେ ଆଣିଛି ବୋହି ଖେଳାଇବି ମୁହିଁ ll

ସଙ୍ଗରେ ଆଣିଛି ପୁଣି ଗଦ ଡେଉଁରିଆ l

ଦେଖ ସର୍ପଙ୍କୁ କରିଛି କେମିତି କିମିଆ ll

ପଦ୍ମତୋଳା ବଜାଉଛି ବାଦ୍ୟ ନାଗେଶ୍ୱରୀ l

ଚକ୍ଷୁଶ୍ରବେ ଖେଳୁଛନ୍ତି ମନ୍ତ୍ର ମୁଗ୍ଧ ପରି ll

ନମ ନମ କେଳାପୁଅ ନମଃ ଦେବ ହର l

ଚିହ୍ନି ନପାରିଲୁ ଆମ୍ଭ ଦୋଷ କ୍ଷମା କର ll

ନମଃ ନମଃ ସଦାଶିବ ନମଃ ଵିଷହର l

ତ୍ରିତାପ ଦହନେ ପ୍ରଭୁ ଅଜ୍ଞାନତା ହର ll

ବିଷୟା ବିଷକୁ ତଵ ପାଶେ ଅଛି ଗଦ l

ତଵ ନାମ ଭଜନରେ ନଲାଗେ ପ୍ରମାଦ ll

ନମସ୍ତୁତେ ନୀଳକଣ୍ଠ ହଳାହଳ ପାୟୀ l

ପାଦେ ପଶୁଛୁ ଶରଣ ସଙ୍ଗେ ମହାମାୟୀ ll