ନୈବେଦ୍ୟ

ମୃତ୍ୟୁ ?

ହେ ସତ୍ୟ ପ୍ରତିମ ଶକ୍ତି 

ହେ ଅତିଥି ଦେବ !

ଆସ ତୁମେ ଅନାହୁତେ

ଧରି ହସ୍ତେ ଯମ ରାଜ ଦଣ୍ଡ ,

ମାଡିଚାଲ ଅରଣା ମଇଁଷି ସମ

ରୋଗ ଦୁଃଖ ଦୁର୍ବିପାକ

ଅସରନ୍ତି ଯନ୍ତ୍ରଣା ରେ କରି ଛଟପଟ ,

ନିଃଶେଷ ଜୀବନ ଚକ୍ର

କାଳପାଶେ ଲୀନହୁଏ

ସ୍ୱଚ୍ଛନ୍ଦ ସବୁଜ ।

କାପୁରୁଷ ଭୀରୁ ନୁହେଁ ଯୋଦ୍ଧା

କପଟାଚାର ନୁହେଁ ତା ଲକ୍ଷଣ,

ଜୀବନ ସଂଗ୍ରାମ ଘୋର

ଲଢେ ବୀର ସମ୍ମୁଖରେ

ମରେ ଅବା

ମାରେ କରି ରଣ,

ବୀରତ୍ୱ ମହାନ କର୍ମ;

ସେଥିପାଇଁ ସମର୍ପିତ

ସଶ୍ରଦ୍ଧ ସୁମନ ।

ପୁଞ୍ଜିଭୂତ କୋହଲୁହ

କ୍ଷୀଣଦେହ,ଜଡପ୍ରାଣ

ଭୟାତଙ୍କ ଜର୍ଜରିତ ଏ ମାନବ

କ'ଣ ଅବା ସମର୍ପିବ

ମୃତ୍ୟୁର ନୈବେଦ୍ୟ ?

ଭୀତତ୍ରସ୍ତ ଆତ୍ମବଳ କପଟ ପୁଞ୍ଜିରେ

ସୁଶୋଭିତ କୀରୀଟ ମର୍ଯ୍ୟାଦା

ପୁଣି କେତେ ସୁରକ୍ଷିତ ?

ସତ୍ୟ ଅଟେ ରାମ ନାମ;

ଜୀବନ ହିଁ ସତ୍ୟ,

ମହାସତୀ ଜୀବନ ସାବିତ୍ରୀ,

ସତ୍ୟବାନ ଜୀବନ ପ୍ରବାହ,

ସ୍ୱଚ୍ଛନ୍ଦ ସତ୍ୟ ଆଲୋକେ ହସିଖେଳି

ଜୀବନକୁ ଜୀଇବାକୁ ଦିଅ,

ରକ୍ଷାକର ନିଜ ପ୍ରତିଶ୍ରୁତି,

ପ୍ରଶାନ୍ତି ପୂର୍ଣ୍ଣତା ପଥେ

ଜୀବନର ହେଉ ଜୟଗାନ;

ଅତଏବ, ପୂର୍ଣ୍ଣଚ୍ଛେଦ,

 ନୈବେଦ୍ୟ ଅର୍ପଣ ।

ସୁରକ୍ଷିତ ହେଉ ସୃଷ୍ଟି

ମଙ୍ଗଳ ବିଧାନ ।।

 ------------