ସାପ ଶିଡି

ରାମ ଓ ଲକ୍ଷ୍ମଣ ପ୍ରିୟ ଦୁଇ ଭାଇ

    ଖେଳୁଛନ୍ତି ସାପଶିଡି

ଆରମ୍ଭ ହେଉଛି ପୁଉଟୁ ଦାନରୁ

    ପାରିଛନ୍ତି ଚକାମୁଠି ।

ସବୁଜ ଦାନଟି   ଅଟେ ରାମଙ୍କର

    ନାମ ହେଉଛି ଜୀବନ

ଲକ୍ଷ୍ମଣ ଚଳାନ୍ତି   ନାଲିଆ ଦାନଟି

    ନାମ ସଙ୍କଟ ମୋଚନ ।

ଗୋଟି ଯାଏ ଗଡି ଶିଡି ଚଢ଼ି ଚଢ଼ି

    ଚଢେ ଉପରକୁ ଦାନ

ଗିଳି ଦିଏ ସାପ  ତଳେଛାଡେ ଲାଞ୍ଜ

    ଲଢନ୍ତି ରାମ ଲକ୍ଷ୍ମଣ ।

ବାହାରେ ଶୁଭିଲା  ଘଣ୍ଟି ଟଙ୍ଗଟଙ୍ଗ

     ଚନାଚୂର ବାରମଜା

କାନ୍ଦିଲା ଭଉଣୀ   ସୀତା ଅଝଟେଇ

     କରିବାକୁ ପେଟପୂଜା ।

ରାମ କହିଗଲେ   ବସିଥା ବାବୁରେ

    ଆସୁଛି ମୁଁ ଅବିଳମ୍ବେ

ସୁନାର ହରିଣୀ   ଗରମ ଗରମ

    ଭଲା ଆସିଗଲା ଏବେ ।

ସାଇକେଲଚଢି  ଫେରିବାଲା ଭାଇ

     ଯାଇଛି ଆଗକୁ ମାଡି

ଦଉଡନ୍ତି ରାମ   ପଛରେ ତାହାର

   ହୋଇଗଲା ଟିକେ ଡେରି ।

ସୀତା ପହଞ୍ଚିଲା ଲକ୍ଷ୍ମଣ ପାରୁଶେ

     କହିଲା ବେଏଗି ଚଳ

ନୋହିଲେ ଏଇନେ ଭାଙ୍ଗି ଦେବି ସବୁ

    ମଜା ସୁଆଙ୍ଗର ଖେଳ ।

ବାବୁ ଲଇଖଣ   ପ୍ରବଳ ପ୍ରତାପ

    କାଟିଦେଲେ ତିନିଗାର

ଏଠାବୁ ଉଠିକି   ଯିବୁନି ସୁନାଟା

    ବାକି ଅଛି ବାଜି ଖେଳ ।

ରାମଲଇଖଣ  ରାଗବାଗ ପାଗି

     କିଣୁଥିଲେ ବାରମଜା

ଏତିକି ବେଳକୁ କୁଆଡୁ ଆସିଲା

     ଉଡ଼ି କୁଜି ଅସରପା ।

ସୀତାର ଆଗରେ ନିଶକୁ ହଲାଇ

    କରିଲା ସେ ଦଣ୍ଡ ନୃତ୍ୟ

ସୀତା ଧାବମାନ ଅସରପା ଭୟେ

    ଦେହ ମୁଣ୍ଡ ସନ୍ନିପାତ ।

ରାମ ଓଲକ୍ଷ୍ମଣ ଘରକୁ ଫେରିଲେ

    ଦେଖିଲେ ପ୍ରାଙ୍ଗଣ ଧ୍ୱସ୍ତ

ସୀତା ଅନ୍ତର୍ଦ୍ଧାନ ଶୁଭୁଛିରୋଦନ

    ଛାଡ଼ିଦେ ମୋତେ ଦୁଷ୍ଟ ।

ମୁହଁ ଲୁଚେଇଚି ସୁଁ ସୁଁ କାନ୍ଦୁଚି

    ଅସରପାର ଛେରେଇ

ଲଙ୍କା ବିପର୍ଯ୍ୟସ୍ତ ମୁଣ୍ଡ ଚକ୍ରବାତ

   ଗୋଟିଦାନା ମିଳେନାହିଁ ।

ଜୀବନ ମରଣ ଖେଳଲୁଚକାଳି

   ଘୋଟିଯାଏ ମହାମାରୀ

ଯୁଗପରେ ଯୁଗ ବିତିଯାଏ ସିନା

   ସରେ ନାହିଁ ସାପଶିଡି ।

ଜଳୁଛି ପିତୁଳା ମରୁନି ରାବଣ

   ଖେଳ ହେଉଅଛି କାଳ

ହାତୀ ଗଳିଯାଏ ପିମ୍ପୁଡ଼ି ଗଳେନା

   ତିଳକଣ ହୁଏ ତାଳ ।