ସାଇକେଲରେ ପର୍ବତାବତରଣ

ସର୍ପିଳ ପଥ ପାହାଡ଼ୁ ଆସେ ଗଡ଼ି ଗଡ଼ି

ସେ ପଥରେ ସାଇକଲ ଦେଇଛି ମୁଁ ଛାଡ଼ି l

ଗୋଡ଼ ଟେକି ହାତ ଭିଡ଼ି ସମ୍ମୁଖରେ ଦୃଷ୍ଟି

ଯାନ ମୋ ଚାଲିଛି ବେଗେ ପବନକୁ କାଟି l

ପ୍ରତେ ହୁଏ ଅନୀଳେ ମୁଁ ଯାଉ ଅଛି ଉଡ଼ି

ନୀଳଆକାଶେ ବିହଙ୍ଗ ଡେଣା ଦୁଇ ଝାଡ଼ି l

ବେଳୁ ବେଳ ଯାନ ଗତି ହେଉଛି ପ୍ରଖର

ହୃଦରେ ଭରିଛି ମୋର ପୁଲକ ଅପାର l

ବିହଙ୍ଗେ ହେ ଦେଖ ଦେଖ ମୁଁ ଉଡ୍ଡୀୟମାନ

ଉଡ଼ି ବୁଲୁ ଥାଅ ସଦା କେଡେ ଭାଗ୍ୟବାନ l

ଏହା କି ଆନନ୍ଦ ତୁମ୍ଭ ହେ ମୁକ୍ତ ବିହଙ୍ଗ

ମୋ ଆନନ୍ଦ ମାତ୍ର କିଛିକ୍ଷଣେ ହେବ ସାଙ୍ଗ l

ମୋତେ କି ସାଥି କରିବ ଦେବ ତୁମ୍ଭ ପର

ସାଥିହୋଇ ଉଡ଼ିଯାନ୍ତେ ମେଘରାଜା ଘର l

ମେଘ ରାଇଜରୁ ପରି ଆଣନ୍ତେ ଉଡ଼ାଇ

ସୁଖରେ ରହନ୍ତେ ଆମେ ସଦା ସାଥିହୋଇ l

ଆହା ମୋ ଭାବନା ଏବେ ହୋଇଆସେ ଅନ୍ତ

ଅଙ୍କା ବଙ୍କା ରାସ୍ତା ହୋଇ ଆସୁଛି ସମାପ୍ତ l

   ପ୍ରତୀତ ହୁଅଇ ଭବେ ସୁଖ କ୍ଷଣିକର

   ସୁଖ ମିଳଇ ଆରୋହି ପର୍ବତ ଶିଖର l