ପ୍ରଣାମ ବୀର ସୁରେନ୍ଦ୍ର ସାଏ

ସମ୍ବଳ ମାଟିର ବୀର ସୁରେନ୍ଦର

ଅଜେୟ ମହା ସଂଗ୍ରାମୀ

ଉନ୍ମୁକ୍ତ ଶାଣିତ ଖଡଗେ ଯାହାର

ମୁକ୍ତି ଲେଲିହାନ ଅଗ୍ନି ।

ଅଶ୍ୱର ପୃଷ୍ଠରେ କରବାଳ ହସ୍ତେ

କରାଳ ସୁରେନ୍ଦ୍ର ବୀର

ଦେଖିବା ମାତ୍ରକେ ଶତ୍ରୁ ଇଂରେଜ

ହେଉଥିଲା ଥରହର ।

ସମର୍ଥ ସାର୍ଥକ ଅସୀମ ବୀରତ୍ୱ

ଦୁର୍ଜୟ ସମର କଳା

ଦେଖିଛି ଅଇରୀ ରଣ କଉଶଳ

ଗଣିଛି ପ୍ରମାଦ ଭଲା ।

ସମ୍ମୁଖ ସମରେ ହୋଇ ଭୟଭୀତ

ଇଂରେଜ ଶତ୍ରୁ ଚତୁର

ବିଶ୍ୱାସରେ ବିଷ ରଚି ଷଡ଼ଯନ୍ତ୍ର

ଲଗାଇଛି ଗୁପ୍ତଚର ।

ହଜାରିବାଗ ର କାଳକୋଠରୀରେ

ଦୁର୍ଗମ ଅସୁରଗଡେ

କଟାଇଛ ବୀର କୋଡ଼ିଏ ବରଷ

ଭାଙ୍ଗି ପଡ଼ି ନାହଁ ଦିନେ ।

ଦୁର୍ଦ୍ଦଷ ଦୁର୍ଜୟ ଅପରା ଅଜେୟ

ଧନ୍ୟ ସୁରେନ୍ଦର ସାଏ

ପରାଭବ କେବେ ମାନି ନାହଁ ତୁମେ

ନିଃଶ୍ୱାସ ଶେଷ ଯାଏ ।

ଅମର ଶହିଦ ପ୍ରଜ୍ଜଳିତ ତୁମେ

ଅମ୍ଳାନ ଜ୍ୟୋତି ମହାନ

ମୁକ୍ତି ସିଦ୍ଧି ପଥେ ଆଲୋକ ବର୍ତ୍ତିକା

ହେ ବୀର କୋଟି ପ୍ରଣାମ ।