ଗଣକବି ବୈଷ୍ଣବ ପାଣି

     ଗଣକବି ବୈଷ୍ଣବ ପାଣି 

     =============

ଧନ୍ୟ ଗଣକବି ବଇଷ୍ଣବ ପାଣି l 

     ଉତ୍କଳ ସାହିତ୍ୟ ସୁଦକ୍ଷ ବିନ୍ଧାଣି ll 

ରଚି ଯାଇଅଛ ସୁଆଙ୍ଗ ନାଟକ l 

      ଗୀତିନାଟ ଚିତ୍ତ ହୁଅଇ ଅଟକ ll 

ଢ଼ିଙ୍କିଶାଳ ଠାରୁ ଢେଙ୍କାନାଳ ବୁଲି l

   ନାଟକ କରିଲ ପଲ୍ଲୀ ଠାରୁ ଦିଲ୍ଲୀ ll

ଛାଡ଼ ମାଡ଼ଖିଆ ବୁଦ୍ଧି ଜଗନ୍ନାଥ l

    କହି ଗଲ କବି ପୋଖତ ଭକତ ll 

ଟିକଟ କାଟିଲ କଲିକତା ଗଲ l

   ହାବୁଡ଼ା ପୋଲକୁ ହାବୁଡ଼ି ପଡ଼ିଲ ll 

ଛିଇ ଛିଇ ମଦ ପିଇବି ମୁଁ ନାହିଁ l 

    କଳାପାଣି ପରି ଦିଶୁ ଅଛି ସେହି ll 

କର୍ଣ୍ଣବଧ ଗୀତିନାଟ ମନେଅଛି l

     କ୍ଷତ୍ରି ନୀତି କର୍ଣ୍ଣ ପାର୍ଥକୁ କହୁଛି ll

ମନାମାନ ତୁହି ଶୁଣରେ ଅର୍ଜୁନ l

   ଉଠୁ ରଥ ମୋର କରିବୁ ତୁ ରଣ ll

ଅଞ୍ଜନୀ କେଶବ ରଥରେ ଅର୍ଜୁନ l

     କ୍ଷତ୍ରିୟର ରୀତି ନ କର ବର୍ଜନ ll

ଅଭିନବ ତୁମ୍ଭ ସଂଳାପ ଚାତୁରୀ l

     ଅଭିନୟ ରୁମ ଉଠିବ ଟାଙ୍କୁରୀ ll

ହସାଇ କନ୍ଦାଇ ପାହିଯାଏ ରାତି l

     ହର୍ଷିତ ଦର୍ଶକ ଘରକୁ ଫେରନ୍ତି ll

ପତ୍ନୀ ବରି ବଈ ରଜକିନୀ ହର l

  ମାହାଙ୍ଗା ଭୂମିରୁ ଉଠିଲା ହୁଙ୍କାର ll 

ମହଙ୍ଗା ପଡ଼ିଲା ବଇଷ୍ଣବ ଜାତି l 

     ବଇଷ୍ଣବର କି ଅଛି ଜାତି ପତି ll 

ଶୁଣିଅଛ ସବୁ ବାରଜାତି ଗୋଲା l 

 ବଇଷ୍ଣବ ହେଲେ ସବୁ ଚାଲିଗଲା ll 

ବଇ ଉତ୍କଳର ବରିଷ୍ଠ ନାଟୁଆ l

    ଝଙ୍କଡ଼ ଘଣ୍ଟୁଆ ଅଳପ ପାଠୁଆ ll 

ଶରଣ ରକ୍ଷଣ ପ୍ରଭୁ ଚକ୍ରଧର l

    ଭକ୍ତି କରି ବଇ ବନ୍ଦିଲା ପୟର ll 

ବୈଷ୍ଣବଲଭିଲା ବଇକୁଣ୍ଠ ବାସ l

   ଏହି ଅଟେ ମମ ସୁଦୃଢ଼ ବିଶ୍ୱାସ ll

ଆଉ କିବା ମୁହିଁ କହିବଇଁ ଗୁଣି l 

    ବିସ୍ମୟ ପ୍ରତିଭା ବଇଷ୍ଣବ ପାଣି ll  

ଗଣ ଗୁଞ୍ଜରିତ ଭାରତୀ ବଇର l

    ଯଥାର୍ଥରେ ଗଣକବି ଉତ୍କଳର ll 

ଶରଦ ପୂର୍ଣ୍ଣିମା ତାଙ୍କ ଜନ୍ମଦିନେ l 

  ଉତ୍କଳବାସୀଙ୍କ ପଡୁଛନ୍ତି ମନେ ll 

              🙏🙏🙏

                 ଅର୍ଜୁନୀ

          -------------

ଅର୍ଜୁନୀ ଚରଣ ବେହେରା

ମୋ -୭୬୯୩୦୯୧୯୭୧