ସାଗର ବେଳାରେ ଜହ୍ନ
ସାଗର ବେଳାରେ ଜହ୍ନ
ବର୍ଷଣ ଶ୍ରାବଣ ପୌର୍ଣ୍ଣମାସୀ ଜହ୍ନ
ଖେଳୁଛି ନୀରଦମାଳେ
ନୀଳମ୍ବୁ ସମ୍ରାଟ ଧରି ଊର୍ମି ଥାଟ
ନୃତ୍ୟରତ ତାଳେ ତାଳେ |
ଥାଇ ସିନ୍ଧୁକୂଳେ ଶୁଭ ଅନୁକୂଳେ
ନୈସର୍ଗିକ ଶୋଭାରାଶି
କରି ସଂଦର୍ଶନ ପୁଲକିତ ମନ
କଳ୍ପନାରେ ଗଲି ଭାସି |
ଚନ୍ଦ୍ରିକା ଚର୍ଚ୍ଚିତା ଯାମିନୀ ଭୂଷିତା
ଘନକୃଷ୍ଣ ମେଘାମ୍ବରେ
ନଭେ ବାରିବାହେ ପବନ ପ୍ରବାହେ
ପ୍ରଧାବିତ ଅନମ୍ବରେ |
ଜଳ ଜଳଦର ଶୁଭ ମିଳନର
ଦୃଶ୍ୟ ଦୃଷ୍ଟ ଦିଗବଳୟେ
ରସା ଆକାଶର ଉନ୍ମତ୍ତ ଆସର
ପରିସ୍ଫୁଟ ପରିଣୟେ |
ନିସର୍ଗ ସୁନ୍ଦରୀ ଶୋଭା ଅର୍ଘ୍ୟ ଧରି
କରୁଥାଏ ବନ୍ଦାପନା
କଳାନିଧି ଅବ୍ଧି ଅଙ୍ଘ୍ରି ଅବ୍ଜ ବନ୍ଦି
ମଣଇ ନିଜକୁ ଧନ୍ୟା |
ବର୍ଣ୍ଣିଳ ମୁଦିରେ ଖେଳଇ ବିଧିରେ
ଲୁଚକାଳି ପର୍ବ ଇନ୍ଦୁ
ଲୁଚିଗଲେ ଛାୟା ବିସ୍ତାରଇ କାୟା
ଭୟଙ୍କର ଦିଶେ ସିନ୍ଧୁ |
ହୋଇଲେ ପ୍ରକାଶ ରଜତାସ୍ୟ ହାସ୍ୟ
ଜ୍ୟୋତ୍ସ୍ନା ହୁଏ ବିଛୁରିତ
ଉଦବେଳିତ ମତି ସେ ସରିତପତି
ଉଲ୍ଲୋଳ ଲୋଳେ ଧାବିତ |
ବାତ୍ସଲ୍ୟ ସ୍ନେହର ନାହିଁ ପଟାନ୍ତର
ଏ ଦୃଶ୍ୟ ଅତି ବିରଳ
ଲଙ୍ଘି ବେଳାଭୁଇଁ ଚାନ୍ଦିନୀକୁ ଛୁଇଁ
ଗରଜଇ ଅବିରଳ |
ଜଳେ ପ୍ରତିଫଳି ଉଠଇ ଉଜ୍ଜଳି
କୌମୁଦୀ ମାର୍ଜିତ କାନ୍ତି
ସାଗର ସତ୍କୃତ ସାଗରଜ କୃତ୍ୟ
ମନେ ଭରିଦିଏ ଶାନ୍ତି |
ଏ ଅମୃତ ସ୍ୱାଦ ଲଭି ମୁଁ ଆହ୍ଲାଦ
ଧରିବାକୁ ଚାନ୍ଦ କରେ
କଲି ଆବାହନ ଶଶକ ଲାଂଛନ
ହସୁଥିଲେ ସୁଧାଧରେ |
ଦୂର ଚକ୍ରବାଳୁ ଘନ ଅନ୍ତରାଳୁ
ମେଘ ମହ୍ଲାର ନିସ୍ୱନ
ସହ ସମତାଳ ଦେଇ ପାରାବାର
କରେ ଘୁ ଘୁ ଗରଜନ |
ବଳଦେବ ଜନ୍ମ ଏ ରକ୍ଷାବନ୍ଧନ
ଗୋ-କୁଳ ପୂଜାବସରେ
ରହି ଶ୍ରୀକ୍ଷେତ୍ରରେ ଶଙ୍ଖନାଭିସ୍ଥଳେ
ନୀଳାଚଳନାଥ ସ୍ମରେ |