ସ୍ଵାଧୀନତା

ମୁକ୍ତ ଆକାଶର ବିସ୍ତାର ଭିତରେ,

ତୋଳି ପାରେ ପକ୍ଷୀ ଯେଉଁ ସଙ୍ଗୀତ,

ସୁନା ପଞ୍ଜୁରୀର ଆବଦ୍ଧରେ ରହି ,

ଗାଇ ପାରେ ନାହିଁ ସେପରି ଗୀତ I 

ନିଜର ଅସ୍ତିତ୍ଵ ଚିହ୍ନିବାକୁ ଲାଗି,

ଦାୟିତ୍ବ ନେବାକୁ ନିଜେ ନିଜର.

ଦରକାର ଅଟେ ସ୍ଵାଧୀନ ଚିନ୍ତନେ,

 ମଣିଷ କରିବ କର୍ମ ନିଜର I 

 ଦେଶ ଗଢା ଅବା ସମାଜର ସୃଷ୍ଟି,

ମୁକ୍ତ ବିଚାରର ଆବଶ୍ୟକତା,

ଯେଉଁଠି ବ୍ୟକ୍ତିର ବ୍ୟକ୍ତ କରିବାର,

ରହିଥାଏ ସମ୍ପୂର୍ଣ୍ଣ ସ୍ଵାଧୀନତା I 

ଧନ ଥାଉ ଯେତେ ଜନ ଥାଉ ଯେତେ,

ଯେତେ ଦେଉ ସମାଜ ପ୍ରଧାନତା ,

ସୁଖରେ ଶାନ୍ତିରେ ବଞ୍ଚିବାର ଲାଗି, 

ସର୍ବ ପ୍ରଥମେ ଲୋଡ଼ା ସ୍ଵାଧୀନତା I