ସାଧବ ବୋହୁ

ଆସିଲା ଯହୁଁ ବରଷା କାଳ

ଆକାଶେ ମେଘ ମାଳ ।

ସବୁଠି ହସେ କଅଁଳେ ଘାସ

ଧରା ଦିଶଇ ଶ୍ୟାମଳ ।।

ଝିପି ଝିପି ଝିପି ମେଘ ବରଷେ

ଓଦା ହୁଏ ଗାଁ ଭୂଇଁ ।

ଚାଷୀଭାଇ ର ମନ ଉଚ୍ଛନ୍ନ

ହଳ କରିବା ପାଇଁ ।।

ପହିଲି ବର୍ଷା ପଡଇ ଯେବେ

ଆସଇ ଶିହରଣ ।

ନାନା ଜାତିର ଫୁଟଇ ଫୁଲ

ପ୍ରକୃତି ର ଏ ଦାନ ।।

ଗାଁ ଦାଣ୍ଡରେ ବରଷା ପାଣି

କାଗଜ ଡଙ୍ଗା ଭାଷେ ।

ନାଲି ନାଲିଆ ସାଧବ ବୋହୁ 

କେଡେ ସୁନ୍ଦର ଦିଶେ ।।

ନାଲି ଟୁକୁ ଟୁକୁ ରଙ୍ଗଟି ତାର

ମସୃଣ ପରି ଦେହ ।

ବରଷା କାଳ ଆସିଲେ ଆସେ

ସଜେଇ ହେଇ ମୁହଁ ।।

ଘାସ ଗାଲିଚାରେ ଚାଲଇ ଯେବେ

ଦିଶଇ କେଡେ ଶୋଭା ।

ସୁନ୍ଦରତା ଆଉ ମଖମଲ୍ଲି ଦେହ

ସତେ କେଡେ ମନଲୋଭା ।।

ଥିରି ଥିରି ଚାଲେ ନୂଆ ବୋହୁ ପରି

ସୁନ୍ଦର ଦିଶଇ ଦେହ ।

କେଉଁ ମାଦକତା ଭରିଛି ବିଧାତା

ମୋହେ ସଭିଙ୍କ ହୃଦୟ ।।

ପିଲା ବେଳରେ ଖେଳିଛି କେତେ

ସାଧବ ବୋହୁ ସାଥେ ।

କୋମଳ ଦେହ ମଖମଲ୍ଲି ରେ

ବିଭୋର କରେ ମୋତେ ।।

ନାହିରେ ଆଉ ଖେଳ ପଡିଆ

ଗୋଚର ଜମି ନାହିଁ ।

ସାଧବ ବୋହୁ ଖୋଜି ବୁଲିଛି

ସୁନ୍ଦର ଗାଁ ଭୂଇଁ ।।

କେତେ ଯତନେ ସୁନ୍ଦର ଦେହେ

ଗଢ଼ିଛି ରେ ବିଧାତା ।

ଛୋଟ ହେଲେବି ସଭିଙ୍କୁ ମୋହେ

ଦେଖେଇ ମହାନତା ।।