ସ୍ୱପ୍ନର ମହଲ

କଲେଜର ସେଇ ପ୍ରଥମ ଦିନରେ

ଆଖି ମୋର ଗଲା ଲାଖି

ଚୁପ୍ ଚାପ୍ ଏକ ସୁନ୍ଦରୀ ଝିଅକୁ

ଦେଇଥିଲି ଯେବେ ଦେଖି ।

କାହିଁକି କେଜାଣି ହୃଦୟ ସ୍ପନ୍ଦନ

ବଢିଗଲା କିଛିକ୍ଷଣ

ମନ କହିଥିଲା ଝିଅ ନୁହେଁ ସିଏ

ମନ ଆକାଶର ଜହ୍ନ ।

କଣେଇ କଣେଇ ଚାହୁଁଥିଲି ନିତି

ନଜର ତା' ଗଲା ପଡି

ଲାଜେଇ ଲତା ସେ ଝାଉଁଳି ଟିକିଏ

ହୃଦେ ଘର ଦେଲା ଗଢି ।

ଇସାରାରେ ସିଏ ହୋଇଗଲା ବନ୍ଦୀ

ପ୍ରୀତିଫୁଲ ଗଲା ଫୁଟି

ସେଇ ସୁବାସରେ ମୋ ଖିଆଲି ମନ

ଯାଇଥିଲା କାହିଁ ଲୋଟି ।

ପ୍ରେମର ରଙ୍ଗରେ ରଙ୍ଗୀନ ହୋଇ ମୁଁ

ଉଡୁଥିଲି ଉଲ୍ଲାସରେ

ସତରେ କି ଯାଦୁ ଭରି ରହିଥିଲା

ତା'ର ପ୍ରୀତି ମହକରେ ।

 ଭିଜୁଥିଲି ମୁହିଁ ସେ ବି ଭିଜୁଥିଲା

ବଢୁଥିଲା ଆମ ପ୍ରୀତି

ଦୁହିଙ୍କ ହୃଦୟେ ବସା ବାନ୍ଧୁଥିଲା

ଅଜାଣତେ ମିଠା ସ୍ମୃତି ।

ସ୍ୱପ୍ନର ମହଲ ଗଢ଼ିଦେଲୁ ଦୁହେଁ

ପୀରତିର ପଥ ଧାରେ

ଭରିଦେଇ ରଙ୍ଗ ଆଜି ବି ରହିଛୁ

ଦୁହିଁଙ୍କର ହୃଦୟରେ ।