ସ୍ୱପ୍ନ କାରିଗର

କେମିତି ଜିଇଁବି ଅଚିନ୍ତା ଜୀବନ

ସ୍ୱପ୍ନକୁ ପାସୋରି ଦେଇ

ମୁଣ୍ଡପରେ ମୋର ଖଣ୍ଡା ଯେ ଝୁଲୁଛି

ସ୍ୱପ୍ନ ସାକାରିବା ପାଇଁ ।

ସ୍ୱପ୍ନ ପାଇଁ ଚେଷ୍ଟା ଜାରି ରହେ ମୋର

ସକାଳୁ ସଞ୍ଜ ହୁଏ

ଏମିତି ନିତି ସ୍ୱପ୍ନ ମନସ୍କରେ

ଘଣ୍ଟା ମିନିଟ ଏକ ହୁଏ ।

ଚାଲିଛି ଆଗେଇ ସାଧନାର ପଥେ

ସିଦ୍ଧି ପ୍ରାପ୍ତ ହବା ପାଇଁ

କେବେ ସେ ସମୟ ଦେଖାହବ କିବା

ତାହା ତ ମୁଁ ଜାଣେନାହିଁ ।

ପାଦେ ପାଦେ ହେଇ ଆଗକୁ ବଢୁଛି

ସୁଖ ଦୁଃଖକୁ ଆଡ଼େଇ

କେତେ ଦୂରେ ମୋର ପଥ ଶେଷହେବ

ଜାଣିବି ଯେ ଜାଣିନାହିଁ ।

ଯେତେ ମୁଁ ଗଢ଼ିଛି ସ୍ୱପ୍ନର କୋଣାର୍କ

ରକ୍ତ ମାଂସ ଯୋଖି ଦେଇ

ଜୀବନ୍ୟାସ ଦେବା ସମୟ ଆସିଲେ

ଭୁଶୁଡି ପଡୁଛି କାହିଁ ।

ଏଇ ଚଲାପଥେ ନବୀନ ପଥିକ

ଚାଲୁଛି ମୁଁ ଏକା ହେଇ

ଝୁଣ୍ଟିଲେ ପଡିଲେ ଖଣ୍ଡିଆ ବି ହେଲେ

ସାହା ପାଇଁ କେହି ନାହିଁ ।

ସ୍ୱପ୍ନ ଭଗ୍ନାବଶେଷ ଯୋଡି ଯୋଡି ମୋର

ଆଶା ଯେ କ୍ଷୀଣ ହେଉଛି

ଜୟ ପରାଜୟକୁ ଭ୍ରୁକ୍ଷେପ ନକରି

କାରିଗର ମୁଁ ସାଜିଛି ।