ସ୍ୱପ୍ନ ହଜିଗଲା ବୋଲି

ନିଦ ଭାଙ୍ଗିଗଲା ସପନ ହଜିଲା

ରାତି ଆଉ କେତେ ବାକି

ସପନ ସୁନ୍ଦରୀ ଆଖି ତଳୁ ମୋର

ଧିରେ ଧିରେ ଯାଏ ଲୁଚି I

ପାରିଜାତ ଫୁଲ ବିପଣୀରେ ବୁଲି

ପାଇଲି ସପନ ଫୁଲ

ଧରି ପାରିଲିନି ହାତରେ ତାହାକୁ

ଦେଇ ପାରିଲିନି ମୂଲ I

ଆଖିର ଲୁହରେ ଭିଜିଗଲା ରାତି

ଭିଜିଲା ସପନ ଶେଯ

ଭିଜିଲା ଆକାଶ ଭିଜିଲା ବତାସ

ହଜିଗଲା ଆଖି ନିଦ I

ଜଳିଗଲା ମୋର ଆଖିର ଲୁହରେ

ସପନର ଜତୁଗୃହ

ଆଉ କାହିଁ ପାଇଁ ସପନ ଦେଖିବି

ଢାଳିବି ଆଖିରୁ ଲୁହ ?

ଅବସ ମୋ ଦେହ ଅବସ ମୋ ମନ

ସପନ ଯାଇଛି ହଜି

ମରଣକୁ ଆଜି ଜୀଉଁଛି ମୁଁ ଏଠି

ଜୀବନକୁ ଖୋଜି ଖୋଜି I