ସ୍ୱଦେଶୀ ବାବୁ
ସ୍ୱଦେଶୀ ବାବୁ
ବିଦେଶରେ ରହି ଆମ ଗାଁ ମାଟିକୁ
ପାସୋରି ଦେଲ ନା ମନେ ଅଛି ସବୁ ?
ତାହାରି କୋଳରେ ଜନମ ନେଲୁ
ତା' ପାଣି ପବନେ ବଡ଼ ହୋଇଲୁ।
ଋଣ ପରିଶୋଧ କରିବା ପାଇଁ କି
ସେବା କରିବାକୁ ଭୁଲି ନ ଯିବୁ !
ମନେପକା ସେଇ ପୁରୁଣା ସ୍ମୃତି
ଆମ୍ୱ ତୋଟା, ନଈ କୂଳ, ଖେଳର ସାଥୀ।
ବରଷାରେ ଭିଜା କାଦୁଅ ଖେଳ କୁ
ବର ଓହଳ ଦୋଳି କାହୁଁ ପାଇବୁ !
ମାଆ ହାତ ରନ୍ଧା ଶାଗ ପଖାଳ
ଭୋକ ବଢ଼ିଯାଏ ହୋଇଲେ ବେଳ।
ପେଟ ପୁରିଯିବ ମନ ନ ଭରିବ
ଫାଷ୍ଟ ଫୁଡ୍ ସେଠି ଯେତେ ଖାଇବୁ !
ପୁନେଇଁ ପରବ ଯାତରା ଯେତେ
ହର୍ଷ ଉଲ୍ଲାସରେ ପାଳନ୍ତି କେତେ।
ଗାଁର ମହକ, ମଧୁର ସଂସ୍କୃତି
ନ ମିଳେ କେଉଁଠି ଯେତେ ଖୋଜିବୁ !
ଏଠି ସେଠି ଜାଣେ ଅନେକ ଭେଦ
ଆମ ତମ କହି ନ କର କ୍ଷୁବ୍ଧ।
ଆମ ସଂସ୍କୃତିକୁ ସମ୍ମାନ ଜଣାଇ
ଜଗତରେ ତୁହି ଶ୍ରେଷ୍ଠ କରିବୁ !