ଆମ ଅଧିକାର
ଆମ ଅଧିକାର
ମୋ ଭାରତ ଦେଶ ଅଟଇ ପବିତ୍ର
ଯହିଁ ଗଙ୍ଗା ବହୁଥାଏ ,
ଯୁଗ ଯୁଗର ଗୌରବ ଗାରିମା
ଅମର କୀର୍ତ୍ତି ସେ ଗାଏ ।
ବୀର ପୁରୁଷଙ୍କ ଶେଷ ରକ୍ତବିନ୍ଦୁ
ମାଟିରେ ଗଲା ନିଗିଡ଼ି,
ଗଣତନ୍ତ୍ର ତହୁଁ ଅଙ୍କୁରିତ ହେଲା
ସ୍ୱାଧୀନ ପଥ ସଜାଡି଼ ।
ଆମେ ନିଜେ ନିଜ ଶାସନ ଚଳାଉ
ସମ୍ବିଧାନ ଲେଖା ନେଇ ,
ଆମ ଅଧିକାର ଲିଖିତ ରହିଛି
ଜନ ହିତକର ପାଇଁ ।
ଦେଶର ସମ୍ପତ୍ତି ଉପରେ ଜାଣଟି
ସମସ୍ତଙ୍କ ଅଧିକାର ,
ସବୁ ଧର୍ମ ଏଠି ସମ୍ମାନ ପାଇବ
ନ ରହିବ ମତାନ୍ତର ।
ସାଂସ୍କୃତିକ , ଶିକ୍ଷାଗତ ଅଧିକାର
ଛଡ଼େଇ ନ ନେବେ କେହି,
ଶୋଷଣ ନ ସହି ବିରୋଧ କରିବା
କ୍ଷମତା ଅଛି ତା' ପାଇଁ।
ସାହସ କା ନାହିଁ ଆମ ଅଧିକାର
ଆମଠାରୁ ଛଡ଼ାଇବ ,
ଆଇନ ଆଗରେ ସଭିଏଁ ସମାନ
ଉଚିତ ନ୍ଯାୟ ମିଳିବ।
ଜାତି, ଧର୍ମ, ବର୍ଣ୍ଣ ତେଜି ବିଭିନ୍ନତା
ଭାତୃତ୍ୱ ଭାବ ରଖିବା
ତେବେ ଯାଇ ଆମେ ସ୍ୱପ୍ନ ରାଇଜକୁ
ସୁନ୍ଦର କରି ଗଢି଼ବା ।