ସ୍ୱଚ୍ଛ ହେଉ ଆମ ମନ ଅଗଣା

ଗଢା ପଞ୍ଚଭୂତେ ଜୀବନ ଆମର

       କ୍ଷିତି ଅପ ତେଜ ବ୍ୟୋମ ମରୂତ

ପ୍ରଦୂଷଣଗ୍ରସ୍ତ ହେଲେ ପରିବେଶ

        କେମିତି ବଞ୍ଚିବ ଆଜି ମଣିଷ ।

ହେଉଅଛି ଧ୍ୱନି ବିକଟ ପ୍ରଚଣ୍ଡ

        କଳଗାଉଣାରେ ବାଜୁଛି ଗୀତ

ବାଜୁଅଛି ଡିଜେ ଉଦ୍ଦଣ୍ଡ ନୃତ୍ୟରେ

        ବଢୁଅଛି ରୋଗ ରକତ ଚାପ ।

ଆମ କଥା ଗୀତ ଶବଦ ସାହିତ୍ୟ

        ପୁରାଣ ଶାସ୍ତ୍ରର ନୀତି ଆଦର୍ଶ

ଲିପିବଦ୍ଧ ଅଛି ପୋଥିରେ କେବଳ

        ହେଉନାହିଁ କର୍ମେ ପ୍ରତିଫଳିତ ।

ଚାଲେ ଖଚ ମିଛ ଲାଞ୍ଚ ଜମାଖୋରୀ

        ଦିନ ଦ୍ୱିପହରେ କଳାବଜାର

ବିଚରା ଖାଉଟି ହୁଏ ହନ୍ତସନ୍ତ

         ମିଳୁଅଛି ଯାହା ବେଶି ଭେଜାଲ ।

ଶିକ୍ଷା ଦୀକ୍ଷା ଧର୍ମ ନାମରେ ବଢୁଛି

         ଠକାମି ଭଣ୍ଡାମି ଲୁଟତରାଜ

ବାନ୍ଧୁଛି ଜମାଟ ରୋଗ ମହାମାରୀ

        ଦୂଷିତ ରକତେ ଭରେ କଳ୍ମୁଷ ।

ଧ୍ୱଂସକୁ ଏଡାଇ ଆସ ଉନ୍ମେଷିବା

         ସୁମଙ୍ଗଳ ଶୁଭ ଚିନ୍ତା ଚେତନା

ରଖିବା ବିଶୁଦ୍ଧ ଆମ ପରିବେଶ

         ସଦା ସ୍ୱଚ୍ଛ ଆମ ମନ ଅଗଣା ।