ରୁଗ୍ଣ ବସନ୍ତ

ଯୋଉ ବସନ୍ତରେ ଦିନେ

ପୃଥିବୀଟା ଦିଶୁଥିଲା

ନୀଳନୀଳ ଛଳଛଳ ଶ୍ୟାମଳ ଗହଳ

ମହମହ ବାସୁଥିଲା ବକୁଳ

ରହିରହି ରାବୁଥିଲା କୋକିଳ

ଟହଟହ ଫୁଲଫଳ

ଏବେ ବସନ୍ତରେ

ନା ଶ୍ୟାମଳ

ନା ବକୁଳ

ନା କୋକିଳ

ନା ଫୁଲଫଳ

ବିପର୍ଯ୍ୟସ୍ତ ପୃଥିବୀ

ବାରୁଦର ଦିଗବଳୟ

ତତଲା ମାଟି

ରୋଗିଣା ପାଣି, ପବନ

ଅସଜଡା ପ୍ରକୃତି

ବିଷର ଜ୍ଵଳାରେ

ବିକଳାଙ୍ଗ ବିଶ୍ଵ

ମୁଖାପିନ୍ଧା ଜୀବ

ତାଜା ତାଜା ରକ୍ତ

ଖିନଭିନ ଦେହ

ହତ୍ୟା ଆତ୍ମହତ୍ୟା

ଜଳାପୋଡା ହିଂସା

କଳହ ଅଶାନ୍ତ କୋଳାହଳ

ପଥଭ୍ରଷ୍ଟ ମଣିଷ

ମାଟି, ପାଣି, ପବନ, ପ୍ରକୃତିକୁ

କରିଛି ହରଣ

ତେଣୁ ବୋଧେ ଆଜି

ବସନ୍ତ ରୁଗ୍ଣ... ବସନ୍ତ ରୁଗ୍ଣ