ରୁଧିରେ ଭିଜିଲା କରମଣ୍ଡଳ
ରୁଧିରେ ଭିଜିଲା କରମଣ୍ଡଳ
ଲୌହ ଦାନବ କି ରକତ ପିପାସୁ
ଦାନବ ଅବା ସେ କାଳ ।
କିଏ ବା କିପରି ଜାଣିବ ଏକଥା
ନିତିଦିନ ଚଳାଚଳ ।୧।
ଗତାଗତ କରେ ଗନ୍ତବ୍ୟ ପଥରେ
କେତେ କେତେ ଆଶା ନେଇ ।
ଯାତ୍ରୀଏ ଗମନ୍ତି ଗନ୍ତବ୍ୟ ସ୍ଥଳକୁ
ନିଜ ନିଜ କର୍ମ ପାଇଁ ।୨।
ସବୁଦିନ ଭଳି ସୁରୁଜ ଉଇଁଲେ
ସେଦିନ ଭୃଗୁବାସର ।
ଜୁନ୍ ମାସ ଦୁଇ ତାରିଖ ଥିଲା ତା
ଦି ହଜାର ତେଇଶିର ।୩।
ବାଲେଶ୍ଵର ଜିଲ୍ଲା ବାହାନଗାଠାରେ
ଚାହିଁ ବସିଥିଲା କାଳ ।
ଦୁର୍ଘଟଣାଗ୍ରସ୍ତ ହୋଇଲା ରୁଧିରେ
ଭିଜିଲା କରମଣ୍ଡଳ ।୪।
କେହିହେଲେ କିଛି ବୁଝିବା ଆଗରୁ
ଶବ୍ଦ ହେଲା ଭୟଙ୍କର ।
ମାଲଗାଡ଼ି ସହ ଧକ୍କା ହୋଇଗଲା
କରମଣ୍ଡଳ ରେଳର ।୫।
ସସ୍ରାଧିକ ଯାତ୍ରୀ ହେଲେ ମୃତାହତ
ଅବୟବ କାର ନାହିଁ ।
ହାତ ଗୋଡ ମୁଣ୍ଡ ନାହିଁ ବା କାହାର
ମୃତ୍ଯୁ ସହ କେ ଲଢଇ ।୬।
ଶୁୁଭେ ହାହାକାର ରୋଳ କ୍ରନ୍ଦନର
ଧକ୍କାହେଲା ବୋଲି ଗାଡି ।
ଶବଦ ଶୁଭିଲା ଜନରବ ହେଲା
ଜନତା ଆସିଲେ ମାଡି ।୭।
ରେଳ ଚକ ତଳେ କିଏ ବା ଭିତରେ
ହାରିଲା ଜୀବନ ତାର ।
ମୃତ୍ଯୁ ସହ କିଏ ସଂଗ୍ରାମ କରୁଛି
ଜନତା କଲେ ଉଦ୍ଧାର ।୮।
ସ୍ବେଚ୍ଛାସେବୀ ଦଳ ଏନ୍ ଡି ଆର୍ ଏଫ୍
ଦଳ ଦଳ ହୋଇ ଆସି ।
ଉଦ୍ଧାର କରିଲେ ଏ ମହାସଙ୍କଟୁ
ଦେବଦୂତ ପ୍ରାୟ ମିଶି ।୯।
ପ୍ରିୟ ପରିିଜନ କେତେ କା ଜୀବନ
ହାନି ଘଟିଲା ଏଥିରେ ।
ଶ୍ରଦ୍ଧାଞ୍ଜଳି ଦିଏ ସଭିଙ୍କି ପ୍ରଭୁଙ୍କୁ
ଏଇ ବିନତି ମୁଁ କରେ ।୧୦।
ଆରୋଗ୍ଯ ଲଭନ୍ତୁ ଆହତ ଯାତ୍ରୀଏ
ଫେରନ୍ତୁ ସେ ସ୍ୱଗୃହକୁ ।
ରକତ ସିକତ ଦୁଃଖଦ ଏ ବାର୍ତ୍ତା
ରହିବ କାଳ କାଳକୁ ।୧୧।