ରଙ୍ଗହୀନ ଆଜି ରତନ ବେଦୀ
ରଙ୍ଗହୀନ ଆଜି ରତନ ବେଦୀ
ବରଷକେ ଥରେ ବୁଲିବାକୁ ଯିବେ
କଳା ଦିଅଁ କଳାମଣି
ମାଉସୀ ମା ଘରେ ରହିବେ ଠାକୁର
ଭାଇ ଭଉଣୀଙ୍କୁ ଘେନି l
ପରିପୂର୍ଣ ହେବ ଆଡପ ମଣ୍ଡପ
ରଙ୍ଗ ହୀନ ରତ୍ନ ବେଦୀ
କୋଟି ଓଡ଼ିଆଙ୍କ ମଉଡମଣୀ ସେ
ଯାଇଛନ୍ତି ଜନ୍ମ ବେଦୀ l
ଆଡପ ମଣ୍ଡପେ ସାତ ଦିନ ଯାଏ
ରହିବେ ତିନି ଠାକୁର
ମାଉସୀ ମା କୁ କଥା ଦେଇଥିଲେ
ରଖିବେ କଳା ଠାକୁର l
ଭାଇ ଭଉଣୀଙ୍କୁ ରଥରେ ବସେଇ
ବରଷକେ ଥରେ ଆସେ
ଯଜ୍ଞ ବେଦୀ ପରେ ମାଉସୀ ମା ସାଥେ
କାଖର ଦୋଳିରେ ବସେ l
ନାନାବିଧ ନୃତ୍ୟ ଗୀତ ତାଳେ ତାଳେ
ଝୁମିବେ ତିନି ଠାକୁର
ସାତ ଦିନ ଯାଏ ଲାଗି ରହିଥିବ
ପରିପୂର୍ଣ ଭୋଗ ସମ୍ଭାର l
ତିନି ରଥେ ତିନି ପତାକାକୁ ରଖି
ପୂଜାର୍ଚ୍ଚନା ଲାଗିଥିବ
ତାଳଧ୍ଵଜ ରଥେ ଲଙ୍ଗଳଧ୍ଵଜ ଯେ
ନିତି ପୂଜା ପାଉଥିବ l
ସୁଭଦ୍ରା ଙ୍କ ରଥେ ପଦ୍ମଧ୍ଵଜ ରଖି
ଆଦରେ ପୂଜା କରିଲେ
ଜନ୍ମ ଜନ୍ମ କ୍ଳେଶ ଦୂର ହୋଇଯିବ
ମା ର ପାଦ ସେବିଲେ l
ଗରୁଡଧ୍ଵଜ ଯେ ନନ୍ଦିଘୋଷ ରଥେ
ପୂଜା ପାଏ ଏହି ଦିନ
କଳାଠାକୁର ଙ୍କୁ ନଦେଖି ଭକତ
କେମିତି କାଟିବ ଦିନ l
ଯଜ୍ଞ ବେଦୀ ପରେ ମାଉସୀ ମା ସାଥେ
ପ୍ରଭୂ ବ୍ୟସ୍ତ ରହିଗଲେ
ମହାଲକ୍ଷ୍ମୀ ଙ୍କର ସେନେହ ଶରଧା
ମନରୁ ପାଶୋରି ଦେଲେ l
କ୍ରୋଧ କରି ମା କବାଟ କିଳିଲେ
ଆଉ ଦେଖା ଦେବେ ନାହିଁ
ମହାପ୍ରଭୁ ଗଲେ ଭଉଣୀ ସହିତ
ମୋତେ କିମ୍ପା ନେଲେ ନାହିଁ l
ଆଡପ ମଣ୍ଡପ ପରିପୂର୍ଣ ଦିଶେ
ରତ୍ନ ମଣ୍ଡପ ଯେ ଫିକା
ବାହୁଡା଼ ପଥକୁ ଭକତ ଚାହିଁଛି
କାଳିଆ ଦେବନି ଧୋକା l
ଗୋମୟ ଜଳରେ ପାକଶାଳା ଧୋଇ
ରାନ୍ଧିବେ ଯେ ସୁପକାର
ମା ହାତ ରନ୍ଧା ସୁସ୍ୱାଦୁ ବ୍ୟଞ୍ଜନ
ଭୁଞ୍ଜିବେ ତିନି ଠାକୁର l
ଏହି ସାତ ଦିନ ପୁଣ୍ୟ ଦିନ ସତେ
କରିଲେ ଜଗା ଦର୍ଶନ
ପାପ ଧୋଇଯିବ ମୁକ୍ତି ମିଳିଯିବ
ଲଭିବ କୋଟିଏ ପୁଣ୍ୟ ।