ଆସ ଅବତରୀ

କୃଷ୍ଣମୟ ଆଜି ଦିଶେ ଚତୁଃର୍ଦ୍ଦିଗ

ବରଷୁ ଅଛି ବରଷା

ଲୀଳାମୟ ଆଜି ଅବତୀର୍ଣ୍ଣ ହେବେ

ମେଣ୍ଟିଯିବ ଯେତେ ଆଶା l

ଏନ୍ତୁଡ଼ିଶାଳଟି କଂସ ବନ୍ଦୀ ଘର

ବାହାରେ କଡା ପ୍ରହରା

ଦେବକୀ ମାତାର କୋହ ଆନନ୍ଦର

ବରଷୁଛି ବାରିଧାରା l

ନିଦ୍ରାଦେବୀ ଆଜି ଅଛନ୍ତି ଅନାଇ

ପ୍ରହରୀ ଆଖିରେ ଭରି

ଚାହିଁ ରହିଛନ୍ତି ବସୁଦେବ ପ୍ରେମେ

ହୃଦୟେ ଆବେଗ ଭରି l

କଂସ ଚାହିଁଅଛି ଅଷ୍ଟମ ଗର୍ଭକୁ

ମାରିବ ପିଟି ଶିଳାରେ

ସପ୍ତମ ଗର୍ଭ ଯେ ଉଭେଇ ଯାଇଛି

ବଢ଼େ ରୋହିଣୀ କୋଳରେ l

ଚାରି ମେଘ ଘୋଟି ବରଷା ଆସୁଛି

ଭସେଇ ନେବ କୃଷ୍ଣ ଙ୍କୁ

ମଥୁରାରୁ ଭାସି ଗୋପରେ ଲାଗିବେ

ଭେଟିବେ ବଡ଼ ଭାଇଙ୍କୁ l

ଚାହିଁଛନ୍ତି ଆଜି ଉଗ୍ରସେନ ଅଜା

ଦେଖିବେ ପଙ୍କଜ ମୁଖ

ପାଦପଦ୍ମ ଛୁଇଁ ପାପ ଧୋଇନେବେ

ବାଟେ ଜଗିଛନ୍ତି ଦେଖ l

ବନ୍ଦୀଶାଳା ଆଜି ଷଠୀ ଘର ସାଜି

ଜାଳୁଛି ଦୀପାଳି ଟିଏ

ଆସ କଳା କାନ୍ହୁ ସମୟ ହେଲାଣି

ରାଧିକା ଲୁହ ଝରାଏ l

ଯଶୋଦା ମାଆର ଵାତ୍ସଲ୍ୟ ମମତା

ଦେଇଛି ପଣତ ମେଲି

ଆସ କଳାକାନ୍ହୁ ପିତାଙ୍କ କାନ୍ଧରେ

ଗୋପପୁରେ ଝୁଲି ଝୁଲି l

ଅଧର୍ମ ମେଲିଛି ଚତୁର୍ଦ୍ଦିଗେ କାୟା

ଆସ କଳାକାନ୍ହୁ ଆସ

ମୁଖରେ ଅମୃତ ହସ ଉକୁଟାଇ

କର ଅଧର୍ମ ବିନାଶ l

ଆଉଥରେ ଜନ୍ମ ନିଅ ବାସୁଦେବ

ହେଉ କାଳୀୟ ଦଳନ

ଧର୍ମ ସଂସ୍ଥାପନେ ଆଉଥରେ ପୁଣି

ହେଉ ସମୁଦ୍ର ମନ୍ଥନ l

ଚିତ୍କାର କରୁଛି ଦ୍ରୌପଦୀ ର ଆତ୍ମା

ଅବତର ହେ ମାଧବ

ପୂଜା ଥାଳି ଧରି ବନ୍ଦାଇବୁ ସର୍ବେ

ଜୟ ହେ ରାଧା ମାଧବ l

ଜନ୍ମ ତିଥି ତବ ଆସୁଛି ଯାଉଛି

ଗାଇ ଗାଇ ତବ ନାମ

ଆଉଥରେ ପ୍ରଭୁ ଅବତରୀ ଆସ

ମୋକ୍ଷ ହେଉ ଚାରିଧାମ l