ରଙ୍ଗ ତୋର ଯିବ ଛାଡ଼ି

ଜୟ ଜୟ ଜଗନ୍ନାଥ ନୀଳାଦ୍ରୀ ମଣ୍ଡନ l

ଜଗତରେ ଉଡ଼ାଇଛ ପତିତ କେତନ ll

ବିଜୟ କରିଛ ପ୍ରଭୁ ମହୋଦଧି ତୀରେ l

ଉତ୍କର୍ଷକଳାର ଦେଶ ପୂଣ୍ୟ ଉତ୍କଳରେ ll

ଘୋଷଯାତ୍ରା କରି କଲ ଭକ୍ତଗଣ ତୋଷ l

ହଳି ଭଦ୍ରା ସାଥେ ଧରି ପ୍ରଭୁ ଜଗଦୀଶ ll

ବିଜୟ ହୋଇଛ ଯାଇ ଗୁଣ୍ଡିଚା ମନ୍ଦିରେ l

ଦର୍ଶନ କରନ୍ତି ଭକ୍ତେ ମହା ଉଲ୍ଲାସରେ ll

ଆଡ଼ପ ଅବଢ଼ା ପାଇ ଭକତେ ସନ୍ତୋଷ l

ଲକ୍ଷ୍ମୀ ଶ୍ରୀମନ୍ଦିରେ ବହିଲେଣି ମହାରୋଷ ll

ଭାଙ୍ଗି ଦେଇଛନ୍ତି ତୋର ରୋଷଘର ଚୁଲି l

ଭାରିଯାକୁ ନେବା ପାଇଁ କିମ୍ପା ଗଲୁ ଭୁଲି ll

ନାରୀମରା ନୀତି ତୋର କାଳେ ଗଲା ନାହିଁ l

ରାଧା ମୀରା ଝୁରି ମଲେ କାଳିଆ କହ୍ନାଇ ll

ଏବେ ପାଳି ଅଟେ ମାଆ ସାଗର ତନୟୀ l

ପୁରୁଣା ସେ କଥା ବୋଧେ ଭୁଲିଗଲୁ ତୁହି ll

ଆଡ଼ପ ମଣ୍ଡପେ ବିଜେ ଖାଉ ତୁ ଅବଢ଼ା l

ମନେନାହିଁ ଦିନେ ହୋଇଥିଲ ଲକ୍ଷ୍ମୀଛଡ଼ା ll

ଭିକ୍ଷାଥାଳ ହାତେ ବାରଦ୍ୱାରେ ଥିଲ ବୁଲି l

ଅନ୍ନ ମୁଠେ ନ ପାଇଲ ଖାଇ ମାଡ଼ ଗାଳି ll

ମାଆ ମୋ କରୁଣାମୟୀ ସାଗର ଦୁଲଣୀ l

ରଙ୍ଗ ତୋର ଯିବ ଛାଡ଼ି ଆରେ ନୀଳମଣି ll

ଜ୍ୟେଷ୍ଠ ଭାଇଙ୍କ ସାଙ୍ଗରେ କରି ପରାମର୍ଶ l

ବେଳ ହୁଁ ସତର୍କ ହେବ ନମଃ ଜଗଦୀଶ ll