ରଙ୍ଗ ବରଷେ ମନ ହରଷେ

ଲିଭିଛି ନିଃଶଦ୍ଦ କଟିଛି ଆପଦ

ଶୀତ ଯାଏ ଗୀତ ଗାଇ

ବରଷିଲା ରଙ୍ଗ ମେଦିନୀ ପୃଷ୍ଠରେ

ସାତ ରଙ୍ଗେ ଦେଲା ଧୋଇ ।

ନାଲି ରଙ୍ଗ ଦେଲା ମନ୍ଦାର ପୁଷ୍ପରେ

ସବୁଜକୁ ଦେଲା ପର୍ଣ୍ଣେ

ହଳଦୀ ବସନ୍ତ ପୀତ ରଙ୍ଗ ଲେପି

ସୁନ୍ଦରୀ ସଜ୍ଜିତ ବନେ ।

ସୁକଣ୍ଠୀ କୋକିଳ କଳା ରଙ୍ଗ ନେଇ

ମଧୁର ତାନରେ ନାଚେ

ନୀଳକାନ୍ତ ମଣି ମନ ନିଏ କିଣି

ସତେ କି ନୀଳାଭ ବିଞ୍ଚେ ।

ବିମ୍ବଫଳ ହେଲା ଓଠେ ମନୋରମ

ବିମ୍ବାଧାରୀ ହେଲେ ହରି

ଗୋଲାପି ପଦୁଅଁ ସର କୋଳେ ଖେଳେ

ଗୋଲାପି ରଙ୍ଗକୁ ନାଇ ।

ସ୍ୱଚ୍ଛ ଶୁଭ୍ର ରଙ୍ଗ ଚନ୍ଦ୍ରମା ଦେହକୁ

ଚାନ୍ଦିନୀ କରଇ ଗର୍ବ

ସକଳ ପରାଣ ରଙ୍ଗରେ ଜିତିଣ

ସାଜିଛି ଏ ହୋଲି ପର୍ବ ।

ଅଦ୍ଭୂତ ରଙ୍ଗରେ ପ୍ରମକୁ ବୁଡାଇ

ହୃଦ କରେ ପୁଲକିତ

ଶତ କୋଟି ନମଃ ତୁମକୁ ହେ ରଙ୍ଗ

 ଜନଗଣେ କଲ ପ୍ରୀତ ।