ରକତେ ଲେଖିଛି ତୋ ନାଁ
ରକତେ ଲେଖିଛି ତୋ ନାଁ
ଭଲ ପାଇବା ଦିନରୁ ତୋ ପାଶେ ମୁଁ
ସମର୍ପି ଦେଇଛି ମୋ ମନ ପ୍ରାଣ ହୃଦୟ
ପ୍ରତିଟି ସ୍ପନ୍ଦନେ କରୁଛି ଅନୁଭବ
ନିଶ୍ବାସ ପ୍ରଶ୍ବାସରେ ପାଇ ତୋର ଛୁଆଁ
ଭୁଲି ମୁଁ ପାରେନା ତୋ ରୂପର ସେ ଛବି
ଆଖି ଆଗେ ନାଚି ଯାଉଛି ଅବିରତ
ଚାହିଁ ରହେ ମୁଁ ଏକ ଲୟେ ଏକମୁହାଁ
ତୋ ବିନା ପ୍ରିୟା ଲାଗେ ସବୁ ଖାଁ ଖାଁ
ମୁଁ ରକତେ ଲେଖିଛି ତୋ ନାଁ
ତୋ ଅନିନ୍ଦ୍ୟ ରୂପ ଲାବଣ୍ୟ ସୁଷମା ଭରା
ମୋତେ ଲାଗେ ସବୁଠୁ ସୁନ୍ଦର ନିଆରା
ଜୀବନେ ରହିଛି ରହିବ ଅପାଶୋରା
ଦୁହେଁ ତ ଦୁହିଁଙ୍କର ହୋଇଛୁ ସାହାରା
ଆସିବନି କେବେ ତୋର କି ମୋର ମନେ
ଟିକିଏ ବି ଛଳନା କି ବାହାନା
ପ୍ରେମ ମୋର ତୋ ପ୍ରତି ହେବନି ଊଣା
ଥିବା ଯାଏଁ ଏ ଜୀବନ କରିବିନି ମୁଁ ପ୍ରତାରଣା
ସାଥେ ସାଥୀ ହୋଇ ଗଢିବା ଆମ ଦୁନିଆଁ
ମୁଁ ରକତେ ଲେଖିଛି ତୋ ନାଁ
ବୁଝିଛି ପ୍ରେମ ଶାଶ୍ଵତ ଚିରନ୍ତନ ସତ୍ୟ
ପବିତ୍ର ନିଷ୍ପାପ ହୃଦୟରେ ବଞ୍ଚି ରହେ ନିତ୍ୟ
ଅତୁଟ ଭରସା ବିଶ୍ଵାସର ଏ ବନ୍ଧନ
ଜନ୍ମ ଜନ୍ମର ଏ ସଂପର୍କ ରହିଥାଏ ଚିରଦିନ
ଦୁଇଟି ଆତ୍ମାର ମିଳନ ଈଶ୍ବରଙ୍କ ବରଦାନ
ଅକ୍ଷୟ ଅସରନ୍ତି ପ୍ରେମର ଦାନ ପ୍ରତିଦାନ
ସରସ ସୁନ୍ଦର ମଧୁମୟ ହୁଏ ଜୀବନ
ପ୍ରେମୀଙ୍କୁ ବାନ୍ଧି ରଖେ ପ୍ରେମ କରି କିମିଆଁ
ମୁଁ ରକତେ ଲେଖିଛି ତୋ ନାଁ ।