ରକ୍ତ
ରକ୍ତ
ରକ୍ତ ମାଗେ ଆଜି ରକ୍ତର ସମ୍ପର୍କ
ଭୁଲି ନିଜ ପିଲାଦିନର କଥା
ସଂକୀର୍ଣ୍ଣ ହୃଦୟ ସାଜେ ରକ୍ତମୁଖା
ବିଶ୍ଵାସରେ ଭରି ରକ୍ତର ଛିଟା ।
ରକ୍ତ ମାନେ ନାହିଁ ରକ୍ତର ବନ୍ଧନ
କାହା ସମ୍ମୋହନେ ହୋଇଛି ବାଇ
ତା' ଶରୀରେ ଆଉ ବହୁନାହିଁ ରକ୍ତ
ରକ୍ତ ସବୁ ପାଣି ଯାଇଛି ହୋଇ ।
ରକ୍ତ ସନ୍ତାନକୁ ବଞ୍ଚାଇବା ପାଇଁ
ଦିନେ ମାଆ ଢାଳିଥିଲା ତା' ରକ୍ତ
ଆଜି ସେ ସନ୍ତାନ ବଡ଼ ହେଲା ପରେ
ମାଆକୁ ଶତଧା କରେ ରକ୍ତାକ୍ତ ।
ରକ୍ତର ମୂଲ୍ୟ ଯେ ଯାଇଛି ବଦଳି
ଶସ୍ତା ହୋଇଛି ସେ ରାସ୍ତା ଘାଟରେ
ଶ୍ୟାମଳ ଧରଣୀ ହୋଇଛି ରକ୍ତାକ୍ତ
ହୀନ ମନୁଷ୍ୟର କୃତଘ୍ନତାରେ ।