ରଖ ଦାରୁଘଟ

ମର୍ତ୍ତ୍ୟ ବଇକୁଣ୍ଠେ ବସି ଭୋକେ ଛଟପଟ

ନିରତେ ତୃଷାର୍ତ୍ତ ରହି ସୁରଧୁନୀ ତଟ |

କଳ୍ପବଟ ମୂଳେ ଥାଇ ବାଞ୍ଛା ଅପ୍ରକଟ

ସେନେହ ସରିତ ସ୍ନାତ ଶୁଷ୍କ ପିନ୍ଧାପଟ |

ଗ୍ରନ୍ଥାଗାରେ କର୍ମରତ ମୂରୁଖ ନିପଟ

ପ୍ରାଣ ପ୍ରଣୟିନୀ ଥାଉ ମଦନ ସଙ୍କଟ |

ପାଲଟେ ପିତଳ କରେ ଧରିଲେ ପୁରଟ 

ମାଧବେ କୋକିଳ ସ୍ଥଳେ ଗାଉଛି କରଟ |

ଅଜ୍ଞାନ ମୁଣ୍ଡରେ ପାଟ ଜ୍ଞାନୀ ମୁଣ୍ଡେ ଜଟ

ବାଘ ଘରେ ଚାଲିଅଛି ମିରିଗ ଝଞ୍ଜଟ |

ସୁଖ-ଶାଖୀ ଶାଖା ଧରୁ ଭାଙ୍ଗେ ଚଟାପଟ

ଏକି ତୋ ବିଚାର ଧନ୍ୟ ଧନ୍ୟ ପୀତପଟ |

ଫଟା କପାଳକୁ ମୋର କରମ ଖର୍ବଟ

ଯାହା ଲେଖିଛି ବିଧାତା ମୋ ଲଲାଟପଟ |

ମୋ ଜୀବନ ପଛେ ନର୍କେ ହେଉ ଲଟପଟ

ଜଗତର ଦୁଃଖ ହର ବ୍ରହ୍ମାଣ୍ଡ ଆକଟ |

ଦାରୁଘଟ କଳ୍ପବଟ ବିଜେ ସିନ୍ଧୁ ତଟ

ନନ୍ଦଚାଟ ରସରାଟ ରମଣୀ ଲମ୍ପଟ |

ଅଘ କାଟ ଭବ ହାଟ ବଣିକ ନିପଟ

ବିରାଟ କରୁଣା କର ଜଗତେ ପ୍ରକଟ |

ହଟାଅ ବିଶ୍ଵରୁ ଘୋର କରୋନା ସଙ୍କଟ

ରସା ହେଉ ରସମୟ କଉସ୍ତୁଭ କଣ୍ଠ |

ହରିହାଟ ହରି ନାଟ ହରି ପାଠ ରଟ 

ନୀଳକୂଟ ବଂଶୀବଟ କୁଞ୍ଜେ ମନାକଟ |

ପଢ଼ ଗୀତା ଭାଗବତ ନିରୂପି ନିର୍ଘଣ୍ଟ 

ଏକମୁଖ ହୋଇ ଡାକ ଟଳିବ ସଙ୍କଟ |

ବେଳ ହେଲା ରତ ରତ ରଖ ଦାରୁଘଟ 

କୃତାଞ୍ଜଳି ପୁଟେ ଜଗା ସ୍ମରେ ବିଶ୍ୱନଟ |