ମାଆ

ମାଆ କିଏ !!

ନିଦାଘ ସହି ଛାଇ ଓଜାଡ଼ି ଦେଉଥିବା ମଣିଷଟିଏ

ଲୁହା ନଳୀରେ ଚୁଲି ଫୁଙ୍କି

ଛଅଣ ବିଡ଼ାରେ, କଳମ ବାଡ଼ିରେ ରୋଷେଇ କରି ଦେଉଥିବା ମଣିଷଟିଏ ।

ମୋତେ ସିଟିମିଟି ଦେଇ

ରସ ଥାଳିରେ ଆଳୁ ଚକଟା ଆଉ ଶୁଖିଲା ଭାତ ଖାଉଥିବା ମଣିଷଟିଏ।

ମୋ ପାଇଁ ସୁଖର ବିଛଣା ବିଛେଇ ଦେଇ

ଜ୍ୱରରେ ଖଇ ଫୁଟୁଥିବା ଶରୀରକୁ କାନ୍ଥରେ ଆଉଜାଇ ବସିଥିବା ମଣିଷଟିଏ ।

ବୁଢ଼ୀ ଅସୁରୁଣୀ ଗପ ଶୁଣାଇ ମୋତେ ଶୋଇ ଦେଇ

ହାତରେ ଡ଼ିବି ଧରି ଘରର କାମ ସାରିବାକୁ ଅଣ୍ଟା ଭିଡୁଥିବା ମଣିଷଟିଏ ।

ଭୋରୁ ଉଠି ମୋତେ ପାଠ ପଢ଼େଇ

ପୁଅର ଵୃତ୍ତି ପରୀକ୍ଷା ସଫଳତାର ବାହାବା ନବାକୁ ସ୍ବପ୍ନ ଦେଖୁଥିବା ମଣିଷଟିଏ ।

ମୋର ମଙ୍ଗଳ ମନାସି, ଦୀପ ବନ୍ଦେଇ

ନିଜ ଆୟୁଷରୁ ସବୁତକ ଦେଇ, ନିସଂଗତାକୁ ଆଦରି ନେଉଥିବା ମଣିଷଟିଏ ।

ମୋତେ ବଡକରି, ମୋତେ ପରିଚୟ ଦେଇ, ସକଳ ଜୀବନର ଆଧାର ହୋଇ

ନିଜ ଠିକଣା କୁ ଆକାର ନଦେଇ, ଚୁପଚାପ ଉଭେଇ ଯାଇଥିବା ମଣିଷଟିଏ ।