Library
Profile
ରଜସ୍ଵଳା ଉର୍ବୀ
ରଜସ୍ଵଳା ଉର୍ବୀ
ମିଥୁନ ରାଶିର ପ୍ରବେଶ ହୋଇଲା
ଆକାଶେ ଭାସେ ବାଦଲ
ଗ୍ରୀଷ୍ମର ଦହନ ଅପସରି ଯିବ
ଧରଣୀ ହେବ ଶୀତଳ ।
ମାଟି ଆକାଶ ର ଶାଶ୍ଵତ ପ୍ରେମରେ
ଗ୍ରୀଷ୍ମ ବର୍ଷା ସନ୍ଧିକ୍ଷଣ
ଅମୃତ ବରଷା କରିଦିଏ ସିକ୍ତା
ରଜସ୍ବଳା ମାଟି ପ୍ରାଣ ।
ଧରିତ୍ରୀ ଆନନ୍ଦ ସୃଷ୍ଟିର ମୋହରେ
ରଜସ୍ୱଳା ତା ସଂକେତ
ଉପଜା ପାଇଁ କି ସକ୍ଷମ ଯେ ଉର୍ବୀ
ମାଟି ବାସ୍ନା କରେ ପ୍ରୀତ ।
ରଜସ୍ବଳା ଧର୍ମ ପାଳନରେ ଉର୍ବୀ
ଦିଏ ବିଜ୍ଞାନର ମତ
ଏଇ ସମୟଟି ବିଶ୍ରାମ ସମୟ
କୁହେ ଏଇ ପର୍ବ ଗୀତ |
ମିଳନ ଆମୋଦେ ଭବ୍ୟ ପ୍ରେମ ରଙ୍ଗେ
ଧରଣୀ ଚ଼ଳ ଚଞ୍ଚଳ
ତ୍ୟାଗମୟୀ ସିଏ ନିଜକୁ ସଜାଡ଼େ
ଦେବାକୁ ସନ୍ତାନେ ବଳ |
ରାଜସ୍ବଳତାରେ ସୃଷ୍ଟିର ସଂକେତ
ଉର୍ବୀର ମନ ଆପ୍ଳୁତ
ଦେବାର ସନ୍ତୋଷ ଲଭିବା ପାଇଁ ସେ
ହେଉଅଛି ଆତ୍ମଗତ |
ନାରୀ ଜାତି ପାଇଁ ବିରାଟ ସଂକେତ
ଏ ପରବ ଗଣପର୍ବ
ତିନି ଦିନ ଧରି କାର୍ଯ୍ୟ ନିବୃତି ଯେ
ଆନନ୍ଦ ମାତନ୍ତି ସର୍ବ ।
ଆମ ସଂସ୍କୃତିର ନିଆରା ସ୍ରୋତରେ
ରଜ ଅଟଇ ସ୍ୱତନ୍ତ୍ର
ନାରୀ ସର୍ବସ୍ଵତା ପ୍ରେମ ମୁଖୀନତା
ସୃଷ୍ଟି ର ମହା ସଂକେତ |
ରଜ ପରବର ଲଳନା ମିଳନ
ସଜବାଜ ଓ ମଉଜ
ଦୋଳି ଝୁଲୁଥାଇ ମନ ଚ଼ହଲେଇ
କେତେ ପିଠାପଣା ଭୋଜ୍ୟ |
ନବ ବସ୍ତ୍ର ଆଉ ନାଲି ଅଳତାରେ
ପାଦ ଦିଶଇ ସୁନ୍ଦର
ପାନ ଦିଆ ନିଆ ପିଠାପଣା ଖିଆ
ଅପୂର୍ବ ସଂସ୍କୃତି ଝର |
ଉର୍ବୀ ରଜସ୍ବଳା ପ୍ରସ୍ତୁତ ହୁଅଇ
କର୍ଷଣ କଷ୍ଟ ନେବାକୁ
କୃଷକ ଦେଖଇ ସବୁଜ ସପନ
ପୂଜି ହଳ ଲଙ୍ଗଳକୁ l
ଗ୍ରୀଷ୍ମ ବରଷାର ଅପୂର୍ବ ମିଳନ
ମାଟିରୁ ମହକ ଉଠେ
ମୌସୁମୀ ଆସଇ ରଜ ପରବରେ
ଆନନ୍ଦ ର ସୁଅ ଛୁଟେ |
ତିନି ଦିନ ପରେ ରଜସ୍ବଳା ଉର୍ବୀ
ସ୍ନାନ ଶୌଚ ବିଧି ମତେ
ବସୁମତୀ ସ୍ନାନ ଲକ୍ଷ୍ମୀଙ୍କ ପୂଜନ
କି ସୁନ୍ଦର ନୀତି ସତେ।
ଏ ପରବ ଆମ ଜୀବନ ଧାରାରେ
ଅପୂର୍ବ ସ୍ମାରକ ଟିଏ
ରଜସ୍ବଳା ଉର୍ବୀ ଦିଏ ତ୍ୟାଗ ରବି
ମନ ଉତ୍ଫୁଲ୍ଲିତ ହୁଏ ।
ସୃଷ୍ଟି ସଙ୍କେତକୁ ହୃଦୟରେ ଧରି
ଧରିତ୍ରୀ ଯେ ରଜୋବତୀ
ବର୍ଷା ଆବାହନୀ ମନ୍ତ୍ରେ ମୁଖରିତ
ଶୁଭେ ରଜ ପୁଣ୍ୟ ଗୀତି ।।
