ରଜ ଗୀତ, ଏକ ଭିନ୍ନ ସ୍ଵାଦ ରେ

ବନସ୍ତେ ଡାକୁନି ଗଜ

ବରଷକ ଥରେ ଆସିଛି ରଜ

ଦେଖୁନାହିଁ ସଜବାଜ।

ଆମ୍ବ ପାଚୁଅଛି ବନେ

ଚନ୍ଦନ ଅଳତା ଚୂଲିକି ଗଲାଣି

ପାଉଡର ବିନ୍ଦି ଘେନେ।

ଚାକୁଣ୍ଡା ଗଛର ଛାଇ,

ରଜ ଦୋଳି ଆଉ ଗଛେ ଝୁଲୁନାହି

ଲୁହା ଦୋଳି ସାଇଁ ସାଇଁ।

ଖୋଷା ରେ ଗଜରା ହାର

ରଜ ପାନ ଆଉ କିଏ ବା ଖାଇବ

ଲିପଷ୍ଟିକ ଓଠରେ ମାର।

ଝୁଲି ଝୁଲି ଚାଲେ ହାତୀ,

ପାନ ଭଙ୍ଗା ଆଉ ଦେଖା ଯାଉନାହିଁ

ଗୁଆ ଖୋଜେ ଗୁଆକାତି।

ଗୁମୁରୁଛି କଳା ମେଘ

ନୂଆ ବସ୍ତ୍ର ଦିଏ କେତେ କଷଣ ଯେ 

ଗୁଳୁ ଗୁଳି ରଜ ପାଗ।

ପଙ୍ଖା ବୁଲୁଥାଏ ଘରେ

ଡହ ଡହ ତାତେ ଘର ଅଗଣା ଲୋ

ମୁଁହ ମାରି ବସ ଘରେ।

ରାସ୍ତା ଘାଟ ଗହଳିଆ

କେଁ କେଁ କରେ ମଟର ଗାଡି ଲୋ

ଥାଉ ରଜ ମଉଜିଆ।

ଆଖିରେ କଜଳ ଗାର 

ନାହିଁ ଆଉ ସେହି କୁଆଁରୀ ମନରେ

ସୁଖ ଶାନ୍ତି ପରିବାର।

ମଇଁଷି ର ଶିଙ୍ଘ ଫଟା,

ଆଉ ଋଷି ନାହିଁ ରାଧିକା ରାଣୀ ଲୋ

ଜାଣିଛି କୃଷ୍ଣ ର ଛଟା।।