ଜୀବନ ଜିଇଁବା ଶିଖୁଛି

ଜୀବନ ରାସ୍ତାରେ ଭାରି ଖାଲ ଢୀପ

ବାରମ୍ବାର ଝୁଣ୍ଟି ପଡୁଛି -

ମନକୁ ବାଧୁଛି, ହୃଦୟ ଭାଙ୍ଗୁଛି

ତଥାପି ଉଠିକି ଚାଲୁଛି ।

ସମ୍ପର୍କ ଗଢିବା ଭାରି କଷ୍ଟକର

ଗଢୁ ଗଢୁ ଭାଙ୍ଗି ଯାଉଛି -

ବିଶ୍ୱାସ ହାରୁଛି ଭରଷା ତୁଟୁଛି

ତଥାପି ଗଢ଼ିବା ଶିଖୁଛି ।

ଆଶାର ଅସଂଖ୍ୟ ବାଲିଘର ମନେ

ସମୟ ବାତ୍ୟାରେ ଭାଙ୍ଗୁଛି -

ଭଗ୍ନାବଶେଷରୁ ଭାଗ୍ୟକୁ ସାଉଁଟି

ତଥାପି ସପନ ଦେଖୁଛି ।

ଅବଶୋଷର ସମୁଦ୍ରଟା ସତେ

ଆଖିରେ ଲହରୀ ଭାଙ୍ଗୁଛି -

କିଛି ହେଇନାହିଁ ଅଭିନୟ କରି

ତଥାପି ମୁରୁକି ହସୁଛି ।  

ଅଢେଇ ଦିନିଆ ଜୀବନଟା କେବେ

ବୋଝ ଭଳି ମନେ ହେଉଛି -

ସପନ ମରୁଛି, ସାହାରା ଖୋଜୁଛି

ତଥାପି ଜୀଇଁବା ଶିଖୁଛି ।