ରେ ମନ
ରେ ମନ
ମନଟି ମୋ ହାତୀ ପରି ବିରାଟ ତା ଆକାର
ଉଡିବୁଲେ ଆକାଶରେ ଐରାବତ ସମାନ,
ଝୁଲି ଝୁଲି ପବନରେ ଯାଇପାରେ ନିମିଷକେ
ମାନେ ନାହିଁ ମନ ହାତୀ ଅଙ୍କୁଶ କି ବନ୍ଧନ ।
ସୂକ୍ଷ୍ମ ତନ୍ତ୍ର ମନ ଯୋଗୁ ଉନ୍ମେଷଇ ଭାବାବେଗ
ଜାଗେ ଅନୁଭବ ସ୍ମୃତି ଇଚ୍ଛା ଆଉ ବିଶ୍ୱାସ,
ଶାରୀରିକ କର୍ମସବୁ ହୋଇପାରେ ସମ୍ପାଦନ
ମନ ମସ୍ତିଷ୍କ ରଜାଙ୍କ ମିଳିଗଲେ ନିର୍ଦ୍ଦେଶ ।
ମଣିଷର ଭକ୍ତି ନିଷ୍ଠା ସଦାଚାର ବ୍ୟବହାର
ଗଢ଼ି ହୁଏ ଭାଙ୍ଗି ଯାଏ ସା°ସାରିକ ସମ୍ପର୍କ,
ସହସ୍ରାର ଚକ୍ର ମଧ୍ୟେ ଶତଦଳ ମାନସ ପଟଳେ
ରହିଥାଏ ମନୋଦଶା ଗଚ୍ଛିତ ଓ ବିହିତ ।
ସ୍ୱଚ୍ଛନ୍ଦ ମନର ଗତି ରହିଥାଏ ପ୍ରଚ୍ଛନ୍ନରେ
ନାହିଁ ତା ପ୍ରକୃତି ସ୍ଥିତି ଦେହ ଅବା ବିଦେହ,
ସଦାଚାର ସ°ଯମତା ସୁବିଚାର କରମ ନିଷ୍ଠାରେ
ମନ ହାତୀ ମାନି ଚଳେ ବିବେକର ଅଙ୍କୁଶ ।
ମଣିଷ ମନ ସ୍ୱଭାବ ଅଟେ ବିଚିତ୍ର ଅନନ୍ୟ
ବିବର୍ତ୍ତନେ ହେଉ ମନ ସୁସ°ହତ ଉଜ୍ଜ୍ୱଳ,
ଲଭିଛି ମନୁଷ୍ୟ ଜନ୍ମ ସାର୍ଥକ ହେଉ ଜୀବନ
ମନୁଆ ହାତୀରେ ମୋର ମାନିଥିବୁ ବୋଲ ।