ରାମ ନାମ ଥରେ ଭଜରେ କୁମର

ରାମ ନାମ ଥରେ ଭଜରେ କୁମର 

କୃଷ୍ଣ ନାମ ଥରେ ଭଜ 

ଜୀବନ ଗଳପ ଅଟଇ ଅଳପ 

ହରି ନାମ ଟିକେ ହେଜ l

ସଂସାର ସାଗର ଘୋର ଭୟଙ୍କର 

ଜୀବନ ଜାହାଜ ଚାଲିଛି ସତ୍ୱର 

ପ୍ରାଣର ସଉଦା ଧରି

ଅଶାନ୍ତ ଲହଡି କାହୁଁ ଆସେ ମାଡି 

ବିଷାଦ ଦିଅଇ ଭରି l

ଆଶାର ସଳିତା ଦୁକୁ ଦୁକୁ ଜଳେ 

ଚାହୁଁ ଚାହୁଁ ଆସେ ଝଡ଼ 

କାହାକୁ ବା ଜଣା ଜୀବନ ଜାହାଜ 

କେଉଁ ଦିଗେ ନେବ ମୋଡ଼ ।

ଦିଗନ୍ତ ବିସ୍ତାରି ଏ ସଂସାର ଦରି 

ନାହିଁ ଏଠି ଥଳକୂଳ 

ରାମ ନାମ ଥରେ ଭଜରେ କୁମର 

ହରି ନାମ ଏଠି ମୂଳ l

କୃଷ୍ଣ ନାମ ଥରେ ଭଜରେ କୁମର 

ଏ ଭବୁ ହୋଇବୁ ପାର 

ବିପଦ ଆପଦେ ଦୁଃଖ ପରମାଦେ 

ଗୋବିନ୍ଦ ନାମଟି ସାର l

ଅନାଦି ଅନନ୍ତ ସର୍ବତ୍ର ପୂରିତ 

କେତେଯେ ତାଙ୍କର ନାମ 

କେବେ ସିଏ ଆଲ୍ଲା କେବେ ବୁଦ୍ଧ, ଯୀଶୁ 

କେବେ କୃଷ୍ଣ କେବେ ରାମ l

ଭକତି ଅନ୍ତରେ ଗାଅରେ କୁମର 

ପ୍ରଭୁଙ୍କ ନାମକୁ ପଦେ 

ସଚରାଚର ସେ ବ୍ରହ୍ମାଣ୍ଡ ଈଶ୍ୱର 

ରହିଛନ୍ତି ସଦା ହୃଦେ l

ସଙ୍କଟ ବେଳରେ ଜଗତର ନାଥ 

ହୋଇବେରେ ତୋତେ ସାହା 

ଏ ଭବ ସାଗର କି'କରିବ ତୋର 

ବଢ଼ାଇ ଦେଲେ ସେ ବାହା ।