ରାଧେ ଶ୍ୟାମ ରାଧେ ଶ୍ୟାମ
ରାଧେ ଶ୍ୟାମ ରାଧେ ଶ୍ୟାମ
ଆଖି ଦେଖି ଦେଲେ ଥରେ ସେ କଳାବଦନ
କାନ ଶୁଣି ଦେଲେ ଥରେ ସେହି ବଂଶୀ ସ୍ୱନ
ସରଗ ମରତେ ଖେଳେ ନୂଆ ଶିହରଣ
ମତୁଆଲା ହୋଇ ଗାଏ ଏକା ତୁମ ନାମ
ରାଧେ ଶ୍ୟାମ ରାଧେ ଶ୍ୟାମ
ଜୟ ରାଧେ ଶ୍ୟାମ....... ।0।
ମୀରା ହୃଦୟରେ ତୁମେ ରାଧା ପ୍ରୀତି ତୁମେ
ଗୋପୀଙ୍କ ମନରେ ତୁମେ ବଂଶୀ ସ୍ଵନେ ତୁମେ
ଗୋପ ଆକାଶରେ ତୁମେ ପୂର୍ଣ୍ଣିମାର ଜହ୍ନ
ପରଶରେ ଝୁମେ ସଦା ଗୋପ ରାତି ଦିନ
ଯଶୋଦା ମାଆର ତୁମେ ପ୍ରାଣ ଗଣ୍ଠି ଧନ
ରାଧେ ଶ୍ୟାମ ରାଧେ ଶ୍ୟାମ
ଜୟ ରାଧେ ଶ୍ୟାମ .... ।।
ଯମୁନା କୂଳରେ ତୁମେ ରାସ କୁଞ୍ଜେ ତୁମେ
ଗୋପାଳ ମେଳରେ ତୁମେ ଗୋବତ୍ସାରେ ବନେ
କଦମ୍ବ ମୂଳରେ ରାଧା ବାହୁ ଛନ୍ଦେ ତୁମେ
ଯୁଗଳ ମୂରତି ଯେହ୍ନେ କ୍ଷଣପ୍ରଭା ଘନେ
ଗୋପ ନଗରୀର ପ୍ରାଣ ତୁମେ ଶ୍ୟାମଘନ
ରାଧେ ଶ୍ୟାମ ରାଧେ ଶ୍ୟାମ
ଜୟ ରାଧେ ଶ୍ୟାମ........।।