ପୁଷି ମାଉସୀର ଇଲିଶି ଖିଆ

ମନଦେଇକରି କାନ ଡେରିଥା

କହୁଛି ମୁଁ ଏକ ବଢ଼ିଆ କଥା 

ଗାଆଁ ଗଡ଼ିଆରୁ ମାଛ ମାରିବାକୁ

ଲୋକମାନେ ବସି ହୋଇଲେ କଥା ।

ଲୁଚି ଶୁଣୁଥିଲା ପୁଷି ମାଉସୀ

ମାଛ ମରା ଦିନ ସଅଳ ଆସି 

ପୋଖରୀ ହୁଡ଼ାରେ ଛପିକି ବସିଲା

ଝାମ୍ପି ନେଇଗଲା ବଡ଼ ଇଲିଶି ।

ପାଟିରୁ ତାହାର ଲାଳ ବୋହିଲା

ଇଲିଶିକୁ ନେଇ ଘରକୁ ଗଲା 

ଏତେ ଦିନ ପରେ ମାଛଟେ ପାଇଛି

ଝୋଳ କରିବାକୁ ମନେ ଭାବିଲା ।

ତରତର କରି ମାଛକୁ ଥୋଇ

ନଈକୁ ମାଉସୀ ଗଲା ଗାଧୋଇ 

ଚଞ୍ଚଳ ଫେରିଲେ ବେସର ସେ ବାଟି

ତିଅଣ ରାନ୍ଧିବ ଚୁଲି ଲଗାଇ ।

କାହିଁ ଛକିଥିଲା ଡାମରା କାଉ

ଟିକିଏ ବିଳମ୍ବ ନକରି ଆଉ 

ଗୋଟା ଇଲିଶିକୁ ଝାମ୍ପି ନେଇଗଲା

ମାଉସୀକୁ ଆମ ସାଧିଲା ଦାଉ ।

ଘରକୁ ଫେରିଲା ଯେବେ ମାଉସୀ

ଦେଖିଲା ନାହିଁ ତା' ବଡ଼ ଇଲିଶି 

ଇଆଡ଼େ ସିଆଡ଼େ ଖୋଜିକି ଦେଖିଲା

ଡାମରା ଖାଉଛି ଗଛରେ ବସି ।

ମନେ ମନେ ସିଏ ହୋଇଲା କହି

ଚୋରି କଲା ଫଳ ପାଇଲି ମୁହିଁ 

ପରିଶ୍ରମ କରି ପାଇଯା' ନ ଥିଲି

ତା' ପାଇଁକି ଦୁଃଖ କରିବି କାହିଁ !!