ବାପା ମୁଁ ବାହା ହେବି

ବାପା ତୁମେ ଆଉ ବିଳମ୍ବ କରନି

ବାହା ଦେଇ ଦିଅ ମୋତେ

କାମ ଦାମ କିଛି ପାରୁ ନାହିଁ ବୋଉ

ଡାକେ ମା ବାପା ରାତେ ।

ଘରକୁ ଖୋଜିବ ଲକ୍ଷ୍ମୀ ପରି ବୋହୁ

ଭୋରୁ ଛାଡିବ ଶେଯ

ରାନ୍ଧି ବାଢୁ ଥିବ ସ୍ବାଦିଷ୍ଟ ରନ୍ଧନ

ବଞ୍ଚିଥିବ ଖାଇ ପେଜ ।

ନିଜ ଦେହ ପ୍ରତି ଧ୍ୟାନ ନଦେଇଣ

ସେବା କରୁ ଥିବ ନିତି

ଯନ୍ତ୍ର ମାନବର ରୂପକୁ ନେବ ସେ

ମନରେ ନକରି ଭୀତି ।

ଛିଡ଼ା ଫଟା ଶାଢ଼ୀ ପରିଧାନ କରି

ଭାବୁ ଥିବ ପାଟ ବସ୍ତ୍ର

ଘର ବିପଦରେ ହାତରେ ଧରିବ

ପନିକି ବେଲଣା ଅସ୍ତ୍ର ।

ସକଳେ କୁହନ୍ତି ଡେଙ୍ଗା ଝିଅ ହେଲେ

ମୁଣ୍ଡରେ ବସିବ ଆସି

ମୋର ହିତ ପାଇଁ ଲାଗିବନି ଜମା

ଉଠା ଲେଶେଣି କି ରଶି ।

ମୋଟି କନ୍ୟା ଯେବେ ଦେଖିବ ବାପା ହେ

ଖୁସି ହେବ ମନ ମୋର

ଭାରି ଜିନିଷକୁ ଉଠାଇବା ପାଇଁ

ହେଉ ଥିବ ଆଗଭର ।

କାଳି ଝିଅ ହେଲେ ଚଳି ଯିବ ବାପା

ଅନ୍ଧକାରେ ଯିବ ମାଡି

ଚୋର ନିଶାଚର ସମ୍ମୁଖେ ପଡ଼ିଲେ

ଭୟରେ ଛାଡିବେ ରଡ଼ି ।

ହୀରା ମୁକ୍ତା ସମ ଚିକିମିକ୍ ହେଲେ

ପରଖି ଦେଖିବ ଥରେ

ଫେସିଆଲ ମୁହେଁ ଦୁଇ ମିନିଟ୍ରେ

ବାନ୍ଧି ନେବ ନିଶ୍ଚେ ମୋହେ ।

ସାଧାରଣ ଏକ ସୁଶୀଳ ସୁକନ୍ୟା

ଯଦି ମିଳି ଯିବ ତୁମେ

ଟଙ୍କା ପଇସାକୁ ଖାତିରି ନକରି

କହିବ ବୋଉର କାନେ ।

ଇଜ୍ଜତ ମୋହର ବଞ୍ଚାଇବା ପାଇଁ

ଜାଣି ଥିବ ଇଙ୍ଗିରାଜୀ

ଏମିତି ଝିଅକୁ ବାହା ଦେଲେ ବାପା

ହୋଇବି ନିଶ୍ଚୟେ ରାଜି ।