ପ୍ରତିଷ୍ଠିତ ହୁଅ ଦେବୀ
ପ୍ରତିଷ୍ଠିତ ହୁଅ ଦେବୀ
ନିର୍ମଳ ହେଲାଣି ନଭ ନାହିଁ ମେଘ ମାଳ
ଚପଳା ଖେଳୁନି ବ୍ୟୋମେ ଲୁଚକାଳି ଖେଳ
ରମ୍ୟ ଶୋଭାବନ ସୃଷ୍ଟି
ଉତ୍କଣ୍ଠିତ ଦେବଗଣ କଲେ ପୁଷ୍ପବୃଷ୍ଟି।।
ସବୁଜ ପାଟ ବସନେ ସଜ୍ଜିତ ମେଦିନୀ
ସଜାଏ ଅଗଣା ଯେହ୍ନେ ନବିନା ରମଣୀ
ପିଠାଉ ଝୋଟି ଚିତା ରେ
କାଶତଣ୍ଡି ଶୋଭୁଅଛି ଧରା ପ୍ରାଙ୍ଗଣ ରେ।।
ଜହ୍ନି ଫୁଲ ହସୁଅଛି ସବୁ ଦୁଃଖ ଭୂଲି
କୃଷ୍ଣପ୍ରିୟା ଆହ୍ଲାଦିତ ସମର୍ପିବ ବୋଲି
ଚାହିଁ ରହିଛି ଶେଫାଳୀ
ଯୁଗ ଯୁଗ ଆଶା ତାର ଯାଇନି ମଉଳି।।
ପୁର ନାରୀ ସଜାଇଲେ ଅଙ୍ଗନ ଭବନ
ସୁନୀଲ ଗଗନ ସମ ନିର୍ମଳ ଯା ମନ
ହୃଦ ପ୍ରାଣ ସମର୍ପଣ
ପ୍ରକୃତି ତତ୍ପର ମାତା କର ଆଗମନ।।
ଦୁର୍ଗତିନାଶିନୀ ଦୁର୍ଗେ ଜଗତ ଜନନୀ
ପ୍ରକଟ ହୁଅ ଗୋ ମାତ! ଅଭୟ ଦାୟିନୀ
ଦ୍ୟାବା ବ୍ୟୋମ ମରୁତରେ
ଆସ ମାତ ପ୍ରତି ବ୍ୟକ୍ତି ଚିନ୍ତା ଚୈତନ୍ୟରେ।।
ପାର୍ଥ ଶବର,ଭବାନିପାଟଣା, କଳାହାଣ୍ଡି